4338 ۔ حضرت عبداللہ بن عمر (رض) بیان کرتے ہیں کہ حضرت عمربن خطاب (رض) نے یہ بات بیان کی ہے کہ مجھے خیبر میں زمین ملی ‘ میں نے عرض کی : یارسول اللہ ! مجھے ایسی زمین ملی ہے کہ میرے نزدیک اس سے زیادہ پسندیدہ زمین مجھے کبھی نہیں ملی اور اس سے زیادہ نفیس زمین کوئی نہیں ہے۔ نبی اکرم (صلی اللہ علیہ وآلہ وسلم) نے فرمایا کہ اگر تم چاہوتو اسے اس طرح صدقہ کرو کہ اصل زمین تمہارے پاس رہے۔
راوی کہتے ہیں : تو حضرت عمر (رض) نے اس زمین کو اس طرح صدقہ کیا کہ اسے فروخت نہیں کی جاسکے گا ‘ ہبہ بھی نہیں کیا جاسکے گا ‘ اس کا پھل غریبوں ‘ قریبی رشتے داروں ‘ غلاموں ‘ مہمانوں ‘ مسافروں کے لیے ہوگا جو شخص اس کا نگران ہوگا اس پر کچھ گناہ نہیں ہوگا ‘ اگر وہ مناسب طریقے سے خود بھی اس میں سے کھالیتا ہے ‘ جبکہ وہ مال جمع کرنے والا نہ ہو۔