4347 ۔ حضرت عبداللہ بن عمر (رض) بیان کرتے ہیں کہ حضرت عمربن خطاب (رض) نے عرض کی : یارسول اللہ ! مجھے ایک زمین ملی ہے جو بہترین ہے ‘ میں یہ چاہتا ہوں کہ اسے صدقہ کردوں ‘ تو نبی اکرم (صلی اللہ علیہ وآلہ وسلم) نے ارشاد فرمایا : تم اس کو اس طرح صدقہ کرو کہ اصل زمین کو فروخت نہ کیا جاسکے ‘ ہبہ نہ کیا جاسکے ‘ وراثت میں تقسیم نہ کیا جاسکے اور اس کے پھل کو (اللہ کی راہ میں) خرچ کردیا جائے۔
راوی کہتے ہیں : تو حضرت عمر (رض) نے اسے اسی طرح صدقہ کیا اور انھوں نے اس کے صدقہ کرنے کی تحریر میں یہ بات لکھوائی کہ یہ اللہ کی راہ میں (یعنی مجاہدین کو) مہمانوں کو ‘ مسافروں کو ‘ غریبوں کو اور قریبی رشتے داروں کو دیا جاسکے گا۔ جو شخص اس زمین کا نگران ہوگا ‘ اگر وہ مناسب طریقے سے اس میں سے کھالیتا ہے یا اپنے کسی دوست کو کھلا دیتا ہے ‘ تو اس پر کوئی حرج اور کوئی گناہ نہیں ہوگا۔