4361 ۔ موسیٰ بن حکیم نامی راوی بیان کرتے ہیں کہ ابن عامرنے حضرت عثمان غنی (رض) کو ایک خط لکھا ‘ میں ان کی خدمت میں حاضر ہوا تو اس وقت تک یہ لوگ ان کے گردگھیراڈال چکے تھے ‘ میں نے اس خط کو اپنے کپڑے میں سی لیا اور اسے اپنی قباء کے اندررکھ لیا ‘ پھر میں نے ایک عورت کالباس پہنا اور اسی طرح گزرتا ہواحضرت عثمان (رض) کے گھر میں داخل ہوگیا ‘ میں ان کے سامنے آکر بیٹھا ‘ میں نے اپنی قباء کو پھاڑا ‘ وہ دیکھتے رہے میں نے وہ خط ان کی طرف بڑھایا ‘ انھوں نے اسے پڑھا اور پھر انھوں نے مسجد کی طرف منہ کرکے دیکھاتو وہاں حضرت طلحہ (رض) مسجد کے مشرقی سمت میں بیٹھے ہوئے تھے ‘ انھوں نے آوازدی : اے طلحہ ! حضرت طلحہ (رض) نے جواب دیا : میں حاضر ہوں ! حضرت عثمان غنی (رض) نے فرمایا : میں آپ کو اللہ کے نام کی قسم دے کر یہ کہتاہوں کہ کیا آپ یہ بات جانتے ہیں کہ نبی اکرم (صلی اللہ علیہ وآلہ وسلم) نے یہ بات ارشاد فرمائی ہے : کون شخص زمین کا یہ ٹکڑاخرید کر اس کے ذریعے مسجد میں توسیع کرے گا ‘ اس کے بدلے میں اسے یہ اجرملے گا تو میں نے اپنے مال میں سے اسے خریدا تھا ‘ تو حضرت طلحہ (رض) نے کہا : اللہ جانتا ہے کہ ایساہی ہے۔ تو حضرت عثمان غنی (رض) نے فرمایا : تواب اس مسجد میں آپ لوگ امن کی حالت میں ہیں اور میں اس میں خوف کے عالم میں ہوں ‘ پھر حضرت عثمان غنی (رض) نے فرمایا : اے طلحہ ! انھوں نے کہا : میں حاضرہوں ! پھر حضرت عثمان (رض) نے فرمایا : میں آپ کو اللہ کے نام کی قسم دے کر یہ کہتاہوں کیا آپ یہ بات جانتے ہیں کہ نبی اکرم (صلی اللہ علیہ وآلہ وسلم) نے یہ بات ارشاد فرمائی تھی : کون شخص رومہ کے کنوئیں کو خریدے گا اور اسے مسلمانوں کے لیے وقف کرے گا ‘ اسے اس کے بدلے میں یہ ‘ یہ کچھ ملے گا ‘ تو میں نے اپنے مال میں سے اسے خریدا تھا ‘ تو انھوں نے کہا : اللہ جانتا ہے کہ ایساہی ہے۔ پھر حضرت عثمان غنی (رض) نے فرمایا : اے طلحہ ! انھوں نے کہا : میں حاضرہوں ! تو حضرت عثمان غنی (رض) نے فرمایا : میں آپ کو اللہ کے نام کی قسم دے کر یہ دریافت کرتا ہوں کہ کیا آپ یہ بات جانتے ہیں کہ میں نے غزوہ تبوک کے لیے ایک سو اونٹ فراہم کیے تھے ‘ تو حضرت طلحہ (رض) نے جواب دیا : اللہ جانتا ہے کہ ایساہی ہے۔ اس کے بعد حضرت طلحہ (رض) نے یہ کہا : اے اللہ ! میرے علم کے مطابق حضرت عثمان (رض) مظلوم ہیں۔