4402 ۔ علقمہ بن وائل اپنے والد کے حوالے سے یہ بات نقل کرتے ہیں :” حضرموت “ سے تعلق رکھنے والا ایک شخص اور کندہ سے تعلق رکھنے والا ایک شخص نبی اکرم (صلی اللہ علیہ وآلہ وسلم) کی خدمت میں حاضر ہوئے۔ حضرمی نے عرض کی : یارسول اللہ ! اس شخص نے میری زمین پر قبضہ کرلیا ہے ‘ وہ زمین میرے والد کی تھی۔ اس شخص نے کہا : وہ زمین میرے ہے اور میرے پاس موجود ہے ‘ میں اس میں زراعت کرتا ہوں ‘ اس شخص کا اس زمین میں کوئی حق نہیں۔ نبی اکرم (صلی اللہ علیہ وآلہ وسلم) نے اس حضرمی سے دریافت کیا : تمہارے پاس کوئی ثبوت ہے ؟ تو اس نے عرض کی کہ نہیں ہے ! نبی اکرم (صلی اللہ علیہ وآلہ وسلم) نے دریافت کیا : پھر یہ دوسرا فریق قسم اٹھائے گا۔ اس حضرمی نے دریافت کیا : یارسول اللہ ! یہ اس چیز کی پروا نہیں کرے گا کہ یہ کیا قسم اٹھارہا ہے ؟ کیونکہ یہ گناہوں کا ارتکاب کرنے سے بچتا نہیں ہے۔ نبی اکرم (صلی اللہ علیہ وآلہ وسلم) نے فرمایا : تمہارے لیے یہی صورت ہے۔ پھر اس شخص نے قسم اٹھائی ‘ جب وہ چلا گیا تو نبی اکرم (صلی اللہ علیہ وآلہ وسلم) نے ارشاد فرمایا : اگر اس نے دوسرے شخص کے مال کی اس لیے قسم اٹھائی ہے ‘ تاکہ اسے ظلم کے طورپرہڑپ کرے ‘ تو جب یہ اللہ تعالیٰ کی بارگاہ میں حاضر ہوگا تو اللہ تعالیٰ اس سے منہ پھیرلے گا۔