4528 ۔ مروان جعفربیان کرتے ہیں کہ میرے والد نے مجھے یہ بات بتائی ہے کہ ایک مرتبہ کوفہ میں حضرت مغیرہ بن شعبہ اور مصقلہ بن ہبیرہ کے درمیان اختلاف ہوگیا تومغیرہ نے مصقلہ کے سامنے حضرت معاویہ (رض) کے قریب ہونے کے حوالے سے فخرکا اظہارکیاتومصقلہ نے ان سے کہا کہ اللہ کی قسم ! میں اس بات کا زیادہ حق رکھتاہوں کہ وہ مجھ سے زیادہ قریب ہوں۔ حضرت مغیرہ (رض) نے ان سے دریافت کیا : وہ کیوں ؟ مصقلہ نے ان سے کہا : اس کی وجہ یہ ہے کہ میں حضرت علی بن ابوطالب (رض) کو مہاجرین اور انصار اور عراق کے بڑے لوگوں کے درمیان چھوڑ کر حضرت معاویہ (رض) سے مل گیا تھا اور ان کے ساتھ تلوار چلاتارہا تھا اور انھوں نے مجھے گورنرمقرر کیا تھا تو میں نے ان کے لیے بنوسامہ بن لوئی کو آزاد کیا تھا ‘ حالانکہ میں ان کی گردنوں کا مالک بن چکا تھا اور کی عزتیں میرے لیے حلال ہوچکی تھیں ‘ جبکہ تم طائف میں ٹھہرے ہوئے تھے اور اپنی بیویوں کے ساتھ خوش ہورہے تھے اور اپنے بچوں کے ساتھ کھیل رہے تھے ‘ تمہاری زبان دراز تھی ‘ تم کنجوس تھے ‘ تمہیں رشتے داری کی پروا نہیں تھی لیکن جب معاملہ ٹھیک ہوگیا تو اس وقت تم ہم پر غالب آگئے۔ حضرت مغیرہ (رض) نے ان سے کہا : اللہ کی قسم ! اے مصقلہ ! تم آج یہی باتیں کیے جارہے ہو ‘ جہاں تک تمہارا حضرت علی (رض) کو چھوڑنے کا تعلق ہے ‘ تو تم نے ایسا کیا ہے ‘ تو تم نے یہ عمل اہل شام سے محبت کی وجہ سے نہیں کیا بلکہ اہل عراق کے ساتھ نفرت کی وجہ سے کیا ہے ‘ جہاں تک تم نے یہ کہا ہے کہ تم نے بنوسامہ بن لوئی کو آزاد کیا ہے ‘ تو حضرت علی (رض) کے ایک قابل اعتماد ساتھی نے تم پر اعتماد کرتے ہوئے انھیں آزاد کیا ہے ‘ اللہ کی قسم ! تم نے اپنے آپ کو ان کے ساتھ متعلق نہیں کیا اور نہ ہی انھیں اپنے مال میں سے آزاد کیا تھا ‘ جہاں تک میرا طائف میں رہنے کا معاملہ ہے ‘ تو اس کی وجہ یہ ہے کہ اللہ تعالیٰ نے مجھے گھربار کی آزمائش میں مبتلا کیا ‘ جس میں تمہیں مبتلا نہیں کیا ‘ جو بیویوں کے بارے میں ہوتی ہے۔ یہ اللہ تعالیٰ کا ہم پر احسان ہے ‘ اگر تم نے ہمارے ساتھ دشمنی کی تو اللہ تعالیٰ تمہیں دیکھ رہا ہے۔