4678 ۔ عاصم بن کلیب انصار سے تعلق رکھنے والے ایک فرد کا یہ بیان نقل کرتے ہیں : ہم لوگ نبی اکرم (صلی اللہ علیہ وآلہ وسلم) کے ساتھ ایک جنازے میں شریک ہوئے ‘ ہم قبرتک آگئے ‘ میں نے توجہ کی تو نبی اکرم (صلی اللہ علیہ وآلہ وسلم) قبرکھودنے والے کو یہ ہدایت کررہے تھے : سر اور پاؤں کی طرف سے قبرکوکھلاکردو ‘ جب آپ (صلی اللہ علیہ وآلہ وسلم) وہاں سے واپس تشریف لارہے تھے تو قریش سے تعلق رکھنے والی ایک خاتون کی طرف سے دعوت دینے والا فرد آپ کے سامنے آیا۔ اس نے عرض کی : فلاں خاتون نے آپ کو اور آپ کے ساتھیوں کو دعوت دی ہے ‘ نبی اکرم (صلی اللہ علیہ وآلہ وسلم) اس خاتون کے ہاں تشریف لے گئے ‘ جب سب لوگ بیٹھ گئے اور کھانالایا گیا تو نبی اکرم (صلی اللہ علیہ وآلہ وسلم) نے اپنا دست مبارک اس کی طرف بڑھایا ‘ لوگوں نے بھی اپنے ہاتھ بڑھا دیئے ۔ نبی اکرم (صلی اللہ علیہ وآلہ وسلم) نے کھاناشروع کیا ‘ اس دوران آپ نے اپنا ہاتھ روک لیا۔ راوی کہتے ہیں : ہم اس جگہ پر بیٹھے ہوئے تھے جہاں بچے اپنے والد کے ساتھ بیٹھتے ہیں ‘ ہمارے والد نے نبی اکرم (صلی اللہ علیہ وآلہ وسلم) کو دیکھا کہ آپ (صلی اللہ علیہ وآلہ وسلم) نے اپنے کھائے ہوئے کو الٹ دیا ہے ‘ تو ان سب افراد نے اپنے بچوں کے ہاتھ پر مار کے ان کے ہاتھ میں موجود بوٹیوں کو گرادیا۔ نبی اکرم (صلی اللہ علیہ وآلہ وسلم) نے فرمایا : مجھے یوں لگا ہے کہ اس بکری کا گوشت اس کے مالک کی اجازت کے بغیر لیا گیا ہے ‘ تو اس خاتون نے پیغام بھیجوایا : یارسول اللہ ! میں نے اپنی بکری تلاش کرنے کے لیے کسی شخص کو بقیع کی طرف بھیجا تھا ‘ لیکن اسے وہ بکری نہیں مل سکی ‘ مجھے پتہ چلا کہ میرے ہمسائے نے بھی ایک بکری خریدی ہے ‘ تو میں نے اسے پیغام بھیجا لیکن اس نے انکار کردیا ‘ ہم اسے حاصل نہیں کرسکے ‘ پھر اس بکری کو اس شخص کی بیوی نے بھجوایا ہے۔ تو نبی اکرم (صلی اللہ علیہ وآلہ وسلم) نے ارشاد فرمایا : یہ قیدیوں کو کھلادو۔