4683 ۔ حضرت مقدام بن معدیکرب (رض) بیان کرتے ہیں کہ نبی اکرم (صلی اللہ علیہ وآلہ وسلم) نے یہ بات ارشاد فرمائی ہے : مجھے کتاب بھی عطاء کی گئی اور وہ چیز بھی عطاء کی گئی ہے جو اس کی مانند ہے ‘(یعنی سنت عطاء کی گئی ہے) عنقریب وہ وقت آئے گا جب کوئی بھرے ہوئے پیٹ والا شخص اپنے بستر کے ساتھ ٹیک لگاکر یہ کہے گا : ہمارے اور تمہارے درمیان اللہ کی کتاب موجود ہے ‘ اس میں جو چیزحلال ہوگی ہم اسے حلال سمجھیں گے اور جو چیز اس میں حرام ہوگی ہم اسے حرام قراردیں گے۔
(نبی اکرم (صلی اللہ علیہ وآلہ وسلم) نے فرمایا ‘ یاراوی نے کہا :)
ایسا نہیں ہے ‘ کسی بھی نوکیلے دانت والے درندے کو کھانا یاپالتوگدھے کو کھانا ‘ معاہد شخص کی گری ہوئی چیز کو اٹھانا جائز نہیں ہے ‘ البتہ اگر وہ کوئی ایسی چیز ہو جس کی ضرورت نہ ہو ‘ تو حکم مختلف ہوگا۔ جو شخص کسی قوم کا مہمان بنا ہو اور وہ لوگ اس کی مہمان نوازی نہیں کرتے تو اسے اس بات کا حق حاصل ہوگا کہ وہ اپنی ضرورت کے مطابق ان سے خوراک زبردستی حاصل کرے۔