سیدہ عائشہ صدیقہ (رض) بیان کرتی ہیں : نبی اکرم (صلی اللہ علیہ وآلہ وسلم) وضو کرتے تھے اور وضو کرنے کے بعد آپ (اپنی اہلیہ کا) بوسہ لے لیتے تھے اور پھر نماز ادا کرتے تھے اور از سر نو وضو نہیں کرتے تھے۔ وکیع نامی راوی نے یہ بات بیان کی ہے : نبی اکرم (صلی اللہ علیہ وآلہ وسلم) اپنی ایک زوجہ محترمہ کا بوسہ لیتے تھے اور پھر نماز ادا کرلیتے تھے۔ اور از سر نو وضو نہیں کرتے تھے۔
ابن مہدی نامی راوی نے یہ بات بیان کی ہے : نبی اکرم (صلی اللہ علیہ وآلہ وسلم) اس (اپنی اہلیہ) کا بوسہ لیتے تھے اور ازسرنو وضو نہیں کرتے تھے۔ ابو عاصم نامی راوی نے یہ بات بیان کی ہے : نبی اکرم (صلی اللہ علیہ وآلہ وسلم) (اپنی اہلیہ کا) بوسہ لیتے تھے اور پھر نماز ادا کرلیتے تھے اور از سر نو وضو نہیں کرتے تھے۔
یہی روایت بعض دیگر اسناد کے ہمراہ بھی منقول ہے، تاہم اس کی سند میں کچھ اختلاف پایا جاتا ہے۔ ایک روایت میں یہ الفاظ ہیں : نبی اکرم (صلی اللہ علیہ وآلہ وسلم) روزے کی حالت میں بوسہ لیتے تھے۔ ایک روایت میں یہ الفاظ ہیں : نبی اکرم (صلی اللہ علیہ وآلہ وسلم) بوسہ لے لیتے تھے اور از سر نو وضو نہیں کیا کرتے تھے، باقی اللہ بہتر جانتا ہے !