رجاء بن مرجی نامی محدث بیان کرتے ہیں : ایک مرتبہ ہم مسجد خیف میں اکٹھے ہوئے، جن میں احمد بن حنبل (رح) تھے، علی بن مدینی تھے اور یحییٰ بن معین تھے، ان لوگوں کے درمیان شرمگاہ کو چھونے کے بارے میں بحث چھڑ گئی تو یحییٰ نے کہا : اس کے بعد وضو کیا جائے گا۔ علی بن مدینی نے اہل کوفہ کے قول کے مطابق رائے بیان کی اور ان کے قول کی تقلید کی۔ یحییٰ بن معین نے اپنے موقف کی تائید میں بسرہ بنت صفوان (رض) کی روایت نقل کی، جبکہ علی بن مدینی نے اپنے موقف کی تائید میں قیس بن طلق کی روایت نقل کی۔
انہوں نے یحییٰ سے کہا : تم بسرہ کی سند کی کیسے پیروی کرسکتے ہو ؟ جبکہ مروان (جو مدینہ کا گورنر تھا) ، اس نے ایک سپاہی کو بھیجا تھا، یہاں تک کہ وہ سپاہی اس خاتون کا جواب لے کر مروان کے پاس آیا تھا، تو یحییٰ نے کہا : اکثر لوگوں نے قیس بن طلق پر تنقید کی ہے اور ان کی روایت کو مستند قرار نہیں دیا، تو امام احمد بن حنبل (رح) نے کہا : آپ دونوں نے جو بات بیان کی ، واقعہ ایسا ہے۔ یحییٰ مہدی نے امام مالک (رح) کے حوالے سے نافع کے حوالے سے، حضرت عبداللہ بن عمر (رض) کے با رے میں یہ بات نقل کی ہے : حضرت عبداللہ بن مسعود (رض) یہ فرماتے ہیں : اس کے بعد وضو کرنا ضروری نہیں ہے، یہ تمہارے جسم کا ایک حصہ ہے، تو یحییٰ نے دریافت کیا : یہ بات کس نے نقل کی ہے ؟ تو انھوں نے جواب دیا : یہ سفیان نے ابوقیس کے حوالے سے ہزیل کے حوالے سے، حضرت عبداللہ (رض) سے یہ بات نقل کی ہے۔ تو جب بھی کسی معاملے میں حضرت عبداللہ بن مسعود (رض) اور حضرت عبداللہ بن عمر (رض) کی رائے مختلف ہو، تو حضرت عبداللہ بن مسعود اس بات کے زیادہ مستحق ہوں گے کہ ان کی پیروی کی جائے۔ تو امام احمد بن حنبل (رح) نے ان سے فرمایا کہ ایسا ہی ہے، لیکن ابوقیس نامی راوی کی روایت کو دلیل کے طور پر پیش نہیں کیا جاسکتا۔ تو انھوں نے کہا : ابونعیم نے معمر کے حوالے سے، عمیر کے حوالے سے، حضرت عمار بن یاسر (رض) کا یہ بیان نقل کیا ہے وہ فرماتے ہیں : مجھے اس بات کی کوئی پروا نہیں ہے، میں اسے (شرمگاہ کو) چھوؤ یا اپنی ناک کو چھو۔
تو امام احمد بن حنبل (رح) نے یہ کہا : حضرت عمار بن یاسر (رض) اور حضرت عبداللہ بن عمر (رض) دونوں ایک ہی مرتبہ کے ہیں، تو جو شخص چاہے وہ ان کی رائے کو اختیار کرے اور جو شخص چاہے وہ ان کی رائے کو اختیار کرے۔