672 ۔ شقیق بیان کرتے ہیں ایک مرتبہ میں حضرت عبداللہ بن مسعود اور حضرت ابوموسی اشعری (رض) کے ساتھ بیٹھا ہوا تھا حضرت ابوموسی اشعری (رض) نے فرمایا اے ابوعبدالرحمن۔ آپ کا کیا خیال ہے اگر کوئی شخص جنبی ہوجائے اسے ایک ماہ تک پانی نہ ملے وہ اس دوران تیمم کرتا رہے گا ؟ تو حضرت عبداللہ نے ارشاد فرمایا وہ تیمم نہیں کرے گا، اگرچہ اسے ایک ماہ تک پانی نہ ملے ۔ تو حضرت ابوموسی اشعری نے فرمایا پھر آپ اس آیت کے بارے میں کیا کہیں گے ؟ جو سورة مائدہ میں موجود ہے (ارشاد باری تعالیٰ ہے ) پھر تم پانی نہیں پاتے ہو تو پاک مٹی کے ذریعے تیمم کرلو۔ حضرت عبداللہ بن مسعود (رض) نے فرمایا۔ اگر لوگوں کو اس بارے میں اجازت دے دی جائے تو عنقریب ایسا وقت آئے گا جب انھیں پانی ٹھنڈا لگے گا تو وہ پاک مٹی سے تیمم کرنے لگیں گے۔
راوی بیان کرتے ہیں : حضرت ابوموسی نے ان سے دریافت کیا آپ اس وجہ سے اس کو ناپسند کرتے ہیں ؟ انھوں نے جواب دیا ہاں ۔ تو حضرت ابوموسی نے ان سے فرمایا، آپ نے وہ بات نہیں سنی ؟ جو عمار (رض) نے حضرت عمر (رض) سے کہی تھی ؟ (انہوں نے بیان کیا تھا) نبی کریم (صلی اللہ علیہ وآلہ وسلم) نے مجھے کسی کام کے سلسلے میں بھیجا میں جنبی ہوگیا مجھے پانی نہ ملا میں مٹی میں لوٹ پوٹ ہوگیا جس طرح کوئی جانور ہوجاتا ہے ، پھر میں نبی کریم (صلی اللہ علیہ وآلہ وسلم) کی خدمت میں حاضر ہوا میں نے اس بات کا تذکرہ آپ سے کیا تو نبی کریم (صلی اللہ علیہ وآلہ وسلم) نے ارشاد فرمایا تمہارے لیے اتناکافی تھا کہ تم دونوں ہاتھ زمین پر مار کر ان میں سے ایک کے ذریعے دوسرے پر مسح کرلیتے۔ پھر ان دونوں کے ذریعے اپنے چہرے کا مسح کرلیتے تو حضرت عبداللہ نے جواب دیا، آپ نے حضرت عمر (رض) کے بارے میں غور نہیں کیا، حضرت عمر نے حضرت عمار (رض) کے بیان پر قناعت نہیں کی تھی۔
یوسف نامی راوی کے الفاظ یہ ہیں : تم اپنے دونوں ہاتھ زمین پر مار کر ان کا مسح کرو پھر ان کے ذریعے اپنے چہرے اور دونوں بازوؤں کا مسح کرلو۔ حضرت عبداللہ نے یہ فرمایا ، کیا آپ نے یہ نہیں دیکھا ؟ حضرت عمر (رض) نے حضرت عمار (رض) کے بیان پر قناعت نہیں کی (یعنی اکتفا نہیں کیا) ۔