711 ۔ ابوقلابہ بنو عامر سے تعلق رکھنے والے ایک شخص کے حوالے سے یہ بات بیان کرتے ہیں مجھے حضرت ابوذر (رض) کے بارے میں بتایا گیا تو میں ان کی خدمت میں حاضر ہوا میں نے ان سے دریافت کیا ، آپ حضرت ابوذر ہیں انھوں نے جواب دیا میرے گھروالے مجھے تو یہی کہتے ہیں ، پھر حضرت ابوذرغفاری (رض) نے بتایا ایک مرتبہ میں نے عرض کیا یارسول اللہ میں ہلاکت کا شکار ہوگیاہوں نبی کریم (صلی اللہ علیہ وآلہ وسلم) نے ارشاد فرمایا تمہیں کس چیز نے ہلاکت کا شکار کردیا ہے میں نے عرض کیا میں ایک ایسی جگہ پر تھا جہاں پانی نہیں مل سکتا تھا میرے پاس میری بیوی بھی تھی مجھے جنابت لاحق ہوگئی تو نبی کریم (صلی اللہ علیہ وآلہ وسلم) نے ارشاد فرمایا پاک مٹی طہارت کے حصول کا ذریعہ ہے جب تک آدمی کو پانی نہ ملے اگرچہ دس برس گزر جائیں جب تمہیں پانی مل جائے تو وہ اپنے جسم پر ڈال لو۔