822 ۔ سیدہ حمنہ بنت جحش (رض) بیان کرتی ہیں : میں انتہائی استحاضہ میں مبتلا تھی ، میں اس کے بارے میں مسئلہ دریافت کرنے کے لیے نبی کریم (صلی اللہ علیہ وآلہ وسلم) کی خدمت میں حاضر ہوئی نبی کریم (صلی اللہ علیہ وآلہ وسلم) اس وقت زینب بنت جحش کے گھر موجود تھے وہ خاتون بیان کرتی ہیں میں نے عرض کی یارسول اللہ میں انتہائی استحاضہ میں مبتلا ہوں اور زیادہ شکایت ہے اس کے بارے میں آپ (صلی اللہ علیہ وآلہ وسلم) کیا رائے دیتے ہیں ؟ اس چیز نے مجھے نماز سے روک دیا ہے ، تو نبی کریم (صلی اللہ علیہ وآلہ وسلم) نے ارشاد فرمایا تم روئی رکھ لیاکرو، خون رک جائے گا، اس خاتون نے عرض کی زیادہ ہوتا ہے ، تو نبی کریم (صلی اللہ علیہ وآلہ وسلم) نے ارشاد فرمایا تم پٹی باندھ لیا کرو اس نے عرض کی، اس سے بھی زیادہ ہوتا ہے ، تو نبی کریم (صلی اللہ علیہ وآلہ وسلم) نے فرمایا تم کپڑا رکھ لیاکرو، عرض کی : اس سے بھی زیادہ ہے تو نبی کریم (صلی اللہ علیہ وآلہ وسلم) نے فرمایا میں تمہیں دو باتوں کی ہدایت کرتا ہوں ان میں سے جو بھی کرلو وہ دوسرے کی جگہ کافی ہے ، اگر تم دونوں کی قوت رکھتی ہو تو تمہیں زیادہ پتہ ہے ، نبی کریم (صلی اللہ علیہ وآلہ وسلم) نے فرمایا یہ شیطان کا ٹھونگا ہے اللہ کے علم کے مطابق تمہارے حیض کے ایام چھ یا سات دن ہیں پھر اس کے بعد تم غسل کرلو، پھر تم دیکھو کہ اب تم پاک ہوگئی ہو تو اس جگہ کو صاف کرلو، پھر تم چوبیس دنوں تک یا تئیس دنوں تک نماز ادا کرتی رہو اور روزہ رکھتی رہو، ایسا کرنا تمہارے لیے جائز ہوگا، ہر مہینے میں اسی طرح کرو جیسا کہ عام طور پر عورتیں حیض اور طہر کے حوالے سے اپنے حیض اور طہر کی مخصوص مدت بسر کرتی ہیں اور اگر تم اس بات کی طاقت رکھتی ہو توظہر کی نماز کو موخر کرو اور عصر کی نماز کو جلدی ادا کرو، پھر غسل کرکے پھر ظہر اور عصر کو ایک ساتھ ادا کرلو، پھر تم مغرب کو موخر کرو اور عشاء کو جلدی پڑھ لو اور غسل کرکے ان دونوں نمازوں کو ایک ساتھ ادا کرو تو تم ایسا بھی کرسکتی ہو تم فجر کے لیے الگ سے غسل کرو، اس طرح تم نمازیں ادا کرو، روزہ رکھو اگر تم اس بات کی طاقت رکھتی ہو ، نبی کریم (صلی اللہ علیہ وآلہ وسلم) نے ارشاد فرمایا میرے نزدیک یہ بات پسندیدہ ہے۔