829 ۔ ابن ابی ملیکہ بیان کرتے ہیں : سیدہ فاطمہ بنت ابی حبیش (رض) کو استحاضہ کی شکایت ہوئی انھوں نے اتنے عرصے سے نماز ادا نہیں کی ، وہ سیدہ عائشہ (رض) کی خدمت میں حاضر ہوئی اور بولی، اے ام المومنین مجھے یہ اندیشہ ہے میں جہنمی نہ ہوجاؤں اور ان کا اسلام میں کوئی حصہ نہ رہے ایک بڑا عرصہ گزرچکا ہے جس میں میں نے نماز نہیں پڑھی مجھے استحاضہ کا خون خارج ہوتا ہے ، سیدہ عائشہ نے کہا تم ٹھہر جب نبی کریم (صلی اللہ علیہ وآلہ وسلم) تشریف لائے تو آپ سے اس طرح دریافت کرنا جس طرح مجھ سے ذکر کیا ہے۔ نبی کریم (صلی اللہ علیہ وآلہ وسلم) تشریف لائے تو سیدہ عائشہ صدیقہ نے عرض کی یارسول اللہ یہ فاطمہ بنت ابوحبیش ہے اس نے مجھ سے ذکر کیا ہے اس کو استحاضہ کی شکایت ہے اور یہ کافی عرصے سے نماز اد ا کرنے پر قادر نہیں ہوسکی اسے یہ اندیشہ ہے کہیں یہ کافر نہ ہوجائے یا اللہ تعالیٰ کی بارگاہ میں اسلام میں اس کا کوئی حصہ نہ رہے۔ نبی کریم (صلی اللہ علیہ وآلہ وسلم) نے ارشاد فرمایا تم فاطمہ سے کہو کہ وہ ہر مہینے میں اپنے حیض کے مخصوص ایام کے دوران نماز کو ترک کردے جب وہ مخصوص ایام گزرجائیں تو وہ ایک مرتبہ غسل کرکے اپنی شرمگاہ پر روئی رکھ کر اس پر ایک چوڑی پٹی باندھ لے تاکہ (خون باہر نہ نکلے ) پھر ہر نماز کے لیے وضو کرکے نماز پڑھ لیا کرے۔ اسے جو چیز لاحق ہوئی ہے وہ شیطان کا ٹھونگا ہے یا کوئی رگ ہے جو منقطع ہوگئی ہے یا کوئی بیماری ہے جو اسے لاحق ہوگئی ہے۔
یہی روایت ایک اور سند کے ہمراہ بھی منقول ہے۔