996 ۔ حضرت جابر بن عبداللہ انصاری (رض) بیان کرتے ہیں : حضرت جبرائیل (علیہ الصلوۃ والسلام) نبی کریم (صلی اللہ علیہ وآلہ وسلم) کی خدمت میں حاضر ہوئے اس وقت سورج ڈھل چکا تھا اور بولے : اے محمد (صلی اللہ علیہ وآلہ وسلم) : اٹھیے اور ظہر کی نماز ادا کیجئے نبی کریم (صلی اللہ علیہ وآلہ وسلم) اٹھے اور آپ (صلی اللہ علیہ وآلہ وسلم) نے سورج ڈھل جانے کے بعد ظہر کی نماز ادا کی۔
پھر کچھ وقت گزر گیا اتنا کہ جب کسی شخص کا سایہ اس کے جتنا ہوجائے تو وہ عصر کے وقت نبی کریم (صلی اللہ علیہ وآلہ وسلم) کے پاس آئے اور بولے : اے حضرت محمد اٹھیے اور عصر کی نماز ادا کیجئے ، نبی کریم (صلی اللہ علیہ وآلہ وسلم) اٹھے اور آپ نے عصر کی نماز ادا کی ، پھر کچھ وقت گزر گیا یہاں تک کہ سورج غروب ہوگیا، تو حضرت جبرائیل (علیہ الصلوۃ والسلام) بولے : اٹھیے اور مغرب کی نماز ادا کیجئے نبی کریم (صلی اللہ علیہ وآلہ وسلم) اٹھے اور آپ نے یہ نماز اسوقت ادا کی جب سورج مکمل غروب ہوچکا تھا، پھر کچھ وقت گزر گیا یہاں تک کہ شفق رخصت ہوگئی، تو حضرت جبرائیل (علیہ الصلوۃ والسلام) نبی کریم (صلی اللہ علیہ وآلہ وسلم) کے پاس آئے اور بولے اٹھیے اور عشاء کی نماز ادا کیجئے نبی کریم (صلی اللہ علیہ وآلہ وسلم) اٹھے اور آپ نے یہ نماز ادا کی ، پھر جبرائیل (علیہ الصلوۃ والسلام) نبی کریم (صلی اللہ علیہ وآلہ وسلم) کے پاس اس وقت آئے جب صبح صادق ہوچکی تھی ، وہ بولے ، اے حضرت محمد (صلی اللہ علیہ وآلہ وسلم) اٹھیے اور نماز ادا کیجئے ، نبی کریم (صلی اللہ علیہ وآلہ وسلم) اٹھے اور آپ نے صبح کی نماز ادا کی ، اگلے دن حضرت جبرائیل (علیہ الصلوۃ والسلام) نبی کریم (صلی اللہ علیہ وآلہ وسلم) کے پاس ظہر کے وقت اس وقت آئے جب آدمی کا سایہ اس کے جتنا ہوچکا تھا، اور بولے : اے حضرت محمد (صلی اللہ علیہ وآلہ وسلم) ! اٹھیے اور ظہر کی نماز ادا کیجئے نبی کریم (صلی اللہ علیہ وآلہ وسلم) اٹھے اور آپ نے ظہر کی نماز ادا کی ، پھر حضرت جبرائیل (علیہ الصلوۃ والسلام) آپ کے پاس اس وقت آئے جب آدمی کا سایہ اس سے دوگنا ہوچکا ہوتا ہے اور بولے : اے محمد (صلی اللہ علیہ وآلہ وسلم) اٹھیے اور عصر کی نماز ادا کیجئے ، نبی کریم (صلی اللہ علیہ وآلہ وسلم) اٹھے اور آپ نے عصر کی نماز ادا کی پھر وہ نبی کریم (صلی اللہ علیہ وآلہ وسلم) کے پاس مغرب کے وقت آئے جب سورج غروب ہوچکا تھا، یہ وہی ایک ہی وقت تھا (اس میں کوئی تاخیر نہیں ہوئی) وہ بولے : آپ اٹھیے اور مغرب کی نماز ادا کیجئے تو نبی کریم (صلی اللہ علیہ وآلہ وسلم) نے مغرب کی نماز ادا کی ، پھر حضرت جبرائیل (علیہ الصلوۃ والسلام) نبی کریم (صلی اللہ علیہ وآلہ وسلم) کے پاس عشاء کی نماز کے لیے اس وقت آئے جب ایک تہائی رات گزرچکی تھی اور بولے اٹھیے اور عشاء کی نماز ادا کیجئے ، نبی کریم (صلی اللہ علیہ وآلہ وسلم) نے یہ نماز ادا کی ، پھر وہ نبی کریم (صلی اللہ علیہ وآلہ وسلم) کے پاس صبح کی نماز کے لیے اس وقت آئے جب روشنی اچھی طرح پھیل چکی تھی ، اور بولے : اٹھیے اور صبح کی نماز ادا کیجئے ، پھر انھوں نے بتایا : ان دونوں کے درمیان کا وقت (نمازوں کا مخصوص شرعی) وقت ہے۔