Ibn Majah: Hadith 4028

انس (رض) کہتے ہیں کہ ایک دن جبرائیل (علیہ السلام) رسول اللہ ﷺ کے پاس آئے، اس وقت آپ غمگین بیٹھے ہوئے تھے، اور لہولہان تھے، اہل مکہ میں سے کچھ لوگوں نے آپ کو خشت زنی کر کے لہولہان کردیا تھا، انہوں نے کہا : آپ کو کیا ہوگیا ؟ تو آپ ﷺ نے فرمایا : ان لوگوں نے میرے ساتھ یہ سلوک کیا ہے ، جبرائیل (علیہ السلام) نے عرض کیا : آپ چاہتے ہیں کہ میں آپ کو کوئی نشانی دکھاؤں ؟ آپ ﷺ نے فرمایا : ہاں دکھائیے ، پھر جبرائیل (علیہ السلام) نے وادی کے پیچھے ایک درخت کی طرف دیکھا، اور کہا : آپ اس درخت کو بلائیے، تو آپ ﷺ نے اسے آواز دی، وہ آ کر آپ کے سامنے کھڑا ہوگیا، پھر انہوں نے کہا : آپ اس سے کہیے کہ وہ واپس جائے، آپ ﷺ نے اسے واپس جانے کو کہا، تو وہ اپنی جگہ چلا گیا، (یہ دیکھ کر) رسول اللہ ﷺ نے فرمایا : میرے لیے یہ نشانی (معجزہ) ہی کافی ہے ۔ تخریج دارالدعوہ : تفرد بہ ابن ماجہ، (تحفة الأشراف (٩٢٥، ومصباح الزجاجة : ١٤١٩) ، وقد أخرجہ : مسند احمد (٣/١١٣) ، سنن الدارمی/المقدمة ٤ (٢٣) (صحیح )