براء بن عازب (رض) کہتے ہیں کہ ہم رسول اللہ ﷺ کے ساتھ حجۃ الوداع کے موقع پر آئے، آپ نے راستے میں ایک جگہ نزول فرمایا اور عرض کیا :الصلاة جامعة، یعنی سب کو اکٹھا ہونے کا حکم دیا، پھر علی (رض) کا ہاتھ پکڑا اور فرمایا : کیا میں مومنوں کی جانوں کا مومنوں سے زیادہ حقدار نہیں ہوں ؟ ، صحابہ کرام رضی اللہ عنہم نے عرض کیا : کیوں نہیں۔ آپ ﷺ نے فرمایا : کیا میں ہر مومن کا اس کی جان سے زیادہ حقدار نہیں ہوں ؟ ، صحابہ کرام رضی اللہ عنہم نے عرض کیا : کیوں نہیں۔ آپ ﷺ نے فرمایا : یہ (علی) دوست ہیں اس کے جس کا میں دوست ہوں، اے اللہ ! جو علی سے محبت رکھے تو اس سے محبت رکھ، جو علی سے عداوت رکھے تو اس سے عداوت رکھ ١ ؎۔ تخریج دارالدعوہ : تفرد بہ ابن ماجہ، (تحفة الأشراف : ١٧٩٧، ومصباح الزجاجة : ٤٨) ، وقد أخرجہ : مسند احمد (٤/٢٨١) (صحیح) (لیکن یہ سند ضعیف ہے، اس میں علی بن زید بن جدعان ضعیف ہیں، اور عدی بن ثابت ثقہ ہیں، لیکن تشیع سے مطعون ہیں، لیکن اصل حدیث شواہد کی وجہ صحیح ہے، نیز ملاحظہ ہو : سلسلة الاحادیث الصحیحة، للالبانی : ١٧٥٠ ) وضاحت : ١ ؎: یہ حدیث نبی کریم ﷺ نے حجۃ الوداع سے لوٹتے وقت غدیرخم میں بیان فرمائی، یہ مکہ اور مدینہ کے بیچ جحفہ میں ایک مقام کا نام ہے، اس حدیث سے علی (رض) کی خلافت بلافصل پر استدلال درست نہیں : ١ ۔ کیونکہ اس کے لئے شیعہ مذہب میں حدیث متواتر چاہیے، اور یہ متواتر نہیں ہے ٢ ۔ ولی اور مولیٰ مشترک المعنی لفظ ہیں، اس لئے کوئی خاص معنی متعین ہو یہ ممنوع ہے، ٣ ۔ امام معہود و معلوم کے لئے مولیٰ کا اطلاق اہل زبان کے یہاں مسلم نہیں، ٤ ۔ خلفاء ثلاثہ (ابوبکر، عمر، عثمان (رض) عنہم) کی تقدیم اجماعی مسئلہ ہے، اور اس اجماع میں خود علی (رض) شامل ہیں، ٥ ۔ اگر اس سے خلافت بلافصل مراد ہوتی تو صحابہ کرام رضی اللہ عنہم ہرگز اس سے عدول نہ کرتے، وہ اہل زبان اور منشاء نبوی کو ہم سے بہتر جاننے والے تھے، ٦ ۔ اس حدیث میں اس بات پر تنبیہ ہے کہ علی (رض) سے محبت کی جائے اور ان کے بغض سے اجتناب کیا جائے، اور یہ اہل سنت والجماعت کا اجماعی عقیدہ ہے کہ سارے صحابہ کرام رضی اللہ عنہم بالخصوص امہات المومنین اور آل رسول سے محبت کی جائے، اور ان سے بغض و عداوت کا معاملہ نہ رکھا جائے۔