ابوہریرہ (رض) سے روایت ہے کہ نبی اکرم ﷺ نے فرمایا : بیشک شیطان انسان اور اس کے دل کے درمیان داخل ہوجاتا ہے، یہاں تک کہ وہ نہیں جان پاتا کہ اس نے کتنی رکعت پڑھی ؟ جب ایسا ہو تو سلام پھیرنے سے پہلے دو سجدے کرے ١ ؎۔ تخریج دارالدعوہ : تفرد بہ ابن ماجہ، (تحفة الأشراف : ١٤٩٦٢) ، وقد أخرجہ : صحیح البخاری/الأذان ٤ (٦٠٨) ، العمل في الصلاة ١٨ (١٢٢٢) ، السہو ٦ (١٢٣١) ، بدء الخلق ١١ (٣٢٨٥) ، صحیح مسلم/السہو ١٩ (٣٨٩) سنن ابی داود/الصلاة ٣١ (٥١٦) ، مسند احمد (٢/٣١٣، ٣٩٨، ٤١١) (حسن صحیح ) وضاحت : ١ ؎: اس حدیث سے معلوم ہوا کہ شک کی صورت میں سلام سے پہلے سجدہ سہو کرے، امام احمد نے عبدالرحمن بن عوف (رض) سے اور بخاری، اور مسلم نے ابوسعید (رض) سے ایسا ہی روایت کیا ہے، اور مغیرہ (رض) کی حدیث میں کمی کی صورت میں سلام کے بعد سجدہ منقول ہے، غرض اس باب میں مختلف حدیثیں وارد ہیں، کسی میں سلام سے پہلے سجدہ سہو منقول ہے، کسی میں سلام کے بعد، اس لیے اہل حدیث نے دونوں طرح جائز رکھا ہے، اور اسی کو صحیح مذہب قرار دیا ہے تاکہ سب حدیثوں پر عمل ہوجائے۔