عامر بن واثلہ ابوالطفیل (رض) کہتے ہیں کہ نافع بن عبدالحارث کی ملاقات عمر بن الخطاب (رض) سے مقام عسفان میں ہوئی، عمر بن الخطاب (رض) نے ان کو مکہ کا عامل بنا رکھا تھا، عمر (رض) نے پوچھا : تم کس کو اہل وادی (مکہ) پر اپنا نائب بنا کر آئے ہو ؟ نافع نے کہا : میں نے ان پر اپنا نائب ابن ابزیٰ کو مقرر کیا ہے، عمر (رض) نے پوچھا : ابن ابزیٰ کون ہے ؟ نافع نے کہا : ہمارے غلاموں میں سے ایک ہیں ١ ؎، عمر (رض) نے کہا : تم نے ان پہ ایک غلام کو اپنا نائب مقرر کردیا ؟ نافع نے عرض کیا : ابن ابزیٰ کتاب اللہ (قرآن) کا قاری، مسائل میراث کا عالم اور قاضی ہے، عمر (رض) نے کہا : اگر بات یوں ہے تو تمہارے نبی کریم ﷺ نے فرمایا ہے : اللہ تعالیٰ اس کتاب (قرآن) کے ذریعہ بہت سی قوموں کو سربلند، اور بہت سی قوموں کو پست کرتا ہے ۔ تخریج دارالدعوہ : صحیح مسلم/المسا فرین ٤٧ (٨١٧) ، (تحفة الأشراف : ١٠٤٧٩) ، وقد أخرجہ : مسند احمد (١/ ٣٥) ، سنن الدارمی/فضائل القرآن ٩ (٣٣٦٨) (صحیح ) وضاحت : ١ ؎: مولیٰ کے معنی رفیق، دوست، آزاد غلام، حلیف، عزیز اور قریب کے ہیں، اور ظاہر یہ ہے کہ یہاں آزاد غلام مراد ہے، اس لئے عمر (رض) نے اس پر تعجب کیا۔