عبداللہ بن عباس (رض) کہتے ہیں کہ عمر (رض) کو خبر ملی کہ سمرہ (رض) نے شراب بیچی ہے تو کہا : اللہ تعالیٰ سمرہ کو تباہ کرے، کیا اسے نہیں معلوم کہ رسول اللہ ﷺ نے فرمایا ہے کہ یہود پر اللہ کی لعنت ہو، اس لیے کہ ان پر چربی حرام کی گئی تھی، تو انہوں نے اسے پگھلایا اور بیچ دیا ١ ؎۔ تخریج دارالدعوہ : صحیح البخاری/البیوع ١٠٣ (٢٢٢٣) ، الأنبیاء ٥٠ (٣٤٥٧) ، صحیح مسلم/المساقاة ١٣ (١٥٨٢) ، سنن النسائی/الفرع والعتیرة ٨ (٤٢٦٢) ، (تحفة الأشراف : ١٠٥٠١) ، وقد أخرجہ : مسند احمد (١/٢٥) ، سنن الدارمی/الأشرابة ٩ (٢١٥٠) (صحیح ) وضاحت : ١ ؎: اور بیچ کر اس کی قیمت کھالی، معلوم ہوا کہ جیسے شراب حرام ہے، ویسے ہی اس کی قیمت لینا اور تجارت کرنا بھی حرام ہے، افسوس ہے کہ ہمارے زمانے میں بعض مسلمان تاجر اپنی دکانوں میں شراب بھی رکھتے ہیں، اور خیال رکھتے ہیں کہ شراب کے بیچنے میں اتنا گناہ نہیں ہے جتنا اس کے پینے میں، حالانکہ حدیث کی رو سے یہ سب برابر ہیں اور سب پر لعنت آتی ہے، اور شراب کا پیشہ حرام ہے، اس کا پینا اور پیلانا دونوں جائز نہیں، اسی طرح سود کا پیشہ اور جو تاجر شراب اور سود کی تجارت کرتا ہو اس کی دعوت میں جاتا تقوی اور دین داری کے خلاف ہے۔