ام المؤمنین عائشہ (رض) سے روایت ہے کہ نبی اکرم ﷺ ان کلمات کے ذریعہ دعا کیا کرتے تھے : اللهم إني أعوذ بک من فتنة النار و عذاب النار ومن فتنة القبر و عذاب القبر ومن شر فتنة الغنى وشر فتنة الفقر ومن شر فتنة المسيح الدجال اللهم اغسل خطاياي بماء الثلج والبرد ونق قلبي من الخطايا كما نقيت الثوب الأبيض من الدنس وباعد بيني وبين خطاياي كما باعدت بين المشرق والمغرب اللهم إني أعوذ بک من الکسل والهرم والمأثم والمغرم اے اللہ ! میں تیری پناہ چاہتا ہوں جہنم کے فتنہ اور جہنم کے عذاب سے، اور قبر کے فتنہ اور اس کے عذاب سے، اور مالداری و فقیری کے فتنے کی برائی سے، اور مسیح الدجال کے فتنے کی برائی سے، اے اللہ ! میرے گناہوں کو برف اور اولے کے پانی سے دھو ڈال، اور میرے دل کو گناہوں سے پاک و صاف کر دے، جس طرح تو نے سفید کپڑے کو میل کچیل سے پاک و صاف کیا ہے، اور میرے اور میرے گناہوں کے درمیان دوری کر دے جس طرح تو نے پورب اور پچھم کے درمیان دوری کی ہے، اے اللہ ! میں تیری پناہ چاہتا ہوں سستی، بڑھاپے، گناہ اور قرض سے ١ ؎۔ تخریج دارالدعوہ : حدیث أبي بکر بن أبي شیبة أخرجہ : صحیح مسلم/الدعوات ١٤ (٥٨٩) ، تحفة الأشرف : ١٦٩٨٨، وحدیث علی بن محمد قد أخرجہ : صحیح البخاری/ الدعوات ٣٩ (٦٢٧٥) ، صحیح مسلم/الذکر ١٤ (٥٨٩) ، (تحفة الأشراف : ١٧٢٦٠) ، وقد أخرجہ : سنن ابی داود/الصلاة ١٥٣ (٥٨٠) ، سنن الترمذی/الدعوات ٧٧ (٣٤٩٥) ، سنن النسائی/الاستعاذة ١٦ (٥٤٦٨) ، مسند احمد (٦/٥٧، ٢٠٧) (صحیح ) وضاحت : ١ ؎: اس بڑھاپے سے پناہ مانگی جس میں آدمی معذور اور بےعقل ہوجاتا ہے، اور مالداری کے فتنے یہ ہیں : بخل، حرص، زکاۃ نہ دینا، سود کھانا، اللہ تعالیٰ سے غافل ہوجانا، مستحقوں کی خبر گیری نہ کرنا وغیرہ وغیرہ، فقیری کا فتنہ یہ ہے کہ مال کے لالچ میں دین کو کھو بیٹھنا، کفار اور فساق کی صحبت اختیار کرنا۔