ابوہریرہ (رض) کہتے ہیں کہ رسول اللہ ﷺ نے فرمایا : زمین سے دابة ظاہر ہوگا، اس کے ساتھ سلیمان بن داود (علیہما السلام) کی انگوٹھی اور موسیٰ بن عمران (علیہ السلام) کا عصا ہوگا، اس عصا (چھڑی) سے وہ مومن کا چہرہ روشن کر دے گا، اور انگوٹھی سے کافر کی ناک پر نشان لگائے گا، حتیٰ کہ جب ایک محلہ کے لوگ جمع ہوں گے تو یہ کہے گا : اے مومن ! اور وہ کہے گا : اے کافر ! ١ ؎۔ تخریج دارالدعوہ : سنن الترمذی/تفسیر القرآن ٢٨ (٣١٨٧) ، (تحفة الأشراف : ١٢٢٠٢) ، وقد أخرجہ : مسند احمد (٢/٢٩٤٥، ٤٩١، ٤٩٦) (ضعیف) (سند میں علی بن زید ضعیف اور اوس بن خالد مجہول راوی ہیں ) وضاحت : ١ ؎: یعنی مومن اور کافر نشان کی وجہ سے معلوم ہوجائیں گے تو ہر ایک شخص مومن کو ایمان کا نشان دیکھ کر مومن کے لقب سے پکارے گا اور کافر کو کفر کا نشان دیکھ کر کافر کہہ کر پکارے گا، غرض اس وقت ایمان اور کفر چھپا نہ رہے گا۔ (امام ابن ماجہ کے شاگرد) ابوالحسن قطان نے (اپنی عالی سند سے بھی) اس سے ملتی جلتی حدیث بیان کی ہے۔ اور اس میں ایک مرتبہ فرمایا : تو یہ کہے گا : اے مومن ! اور یہ (کہے گا) اے کافر !