Ibn Abi Shaybah: Hadith 28999

(٢٩٠٠٠) حضرت ابو عبدالرحمن فرماتے ہیں کہ حضرت علی نے ارشاد فرمایا : اہل شام میں سے چند لوگوں نے شراب پی۔ اس وقت ان پر یزید بن ابو سفیان امیر تھے اور ا ن لوگوں نے کہا : اللہ تعالیٰ فرماتے ہیں کہ ایمان اور اعمال صالحہ والوں پر کوئی چیز کھانے میں کوئی حرج نہیں۔ یزید بن ابی سفیان نے اس بارے میں حضرت عمر کو خط لکھا۔ حضرت عمر نے فرمایا کہ قبل اس کے کہ یہ لوگ فساد مچائیں انھیں میرے پاس بھجوا دو ۔ جب وہ آئے تو حضرت عمر نے ان کے بارے میں مشورہ کیا۔ آپ سے کہا گیا اے امیرالمومنین ! ان لوگوں نے اللہ کے بارے میں جھوٹ بولا اور شریعت میں شریعت کے خلاف بات کی۔ لہٰذا انھیں قتل کروا دیں۔ اس دوران حضرت علی خاموش رہے۔ حضرت عمر نے پوچھا اے ابوالحسن ! آپ کیا کہتے ہیں ؟ حضرت علی نے کہا کہ اگر وہ توبہ کرتے ہیں تو انھیں اسی کوڑے لگائیں اگر توبہ نہ کریں تو قتل کردیں۔ انھوں نے اللہ پر جھوٹ گھڑا ہے۔ حضرت عمر نے ان سے دریافت کیا تو انھوں نے توبہ کا اظہار کیا اس پر انھیں صرف اسی کوڑوں کی سزا دی گئی۔