Ibn Abi Shaybah: Hadith 32688

(٣٢٦٨٩) حضرت ابو قلابہ (رض) فرماتے ہیں کہ جب حضرت عثمان (رض) کو شہید کردیا گیا تو ایلیاء مقام پر بہت سے خطیبوں نے خطاب کیا پس ان کے آخر میں نبی کریم (صلی اللہ علیہ وآلہ وسلم) کے ایک صحابی جن کا نام کعب بن مرہ (رض) تھا وہ کھڑے ہوئے اور فرمایا : اگر یہ حدیث میں نے خود رسول اللہ (صلی اللہ علیہ وآلہ وسلم) سے نہ سنی ہوتی تو میں کبھی کھڑا نہ ہوتا۔ رسول اللہ (صلی اللہ علیہ وآلہ وسلم) نے فتنہ کا ذکر کیا ۔ میر اگمان ہے کہ اس کو بہت قریب بتلایا تو ایک آدمی جس کا سر چادر سے چھپا ہوا تھا وہ گزرا ۔ رسول اللہ (صلی اللہ علیہ وآلہ وسلم) نے فرمایا : اس دن یہ شخص اور اس کی جماعت حق پر ہوگی۔ پس میں اس شخص کے پیچھے گیا پھر میں نے اس کو کندھوں سے پکڑ کر رسول اللہ (صلی اللہ علیہ وآلہ وسلم) کی طرف اس کے چہرے کو پھیرا اور پوچھا : یہ شخص ؟ آپ (صلی اللہ علیہ وآلہ وسلم) نے فرمایا : جی ہاں۔ پس وہ حضرت عثمان (رض) تھے۔