Ibn Abi Shaybah: Hadith 38128

(٣٨١٢٩) حضرت حسن بن سعد روایت کرتے ہیں کہ جب نبی کریم (صلی اللہ علیہ وآلہ وسلم) کو حضرت زید، جعفر اور عبداللہ بن رواحہ کے قتل کی خبر ملی تو آپ (صلی اللہ علیہ وآلہ وسلم) نے لوگوں کو یہ وفات کی خبر سُنائی اور آپ (صلی اللہ علیہ وآلہ وسلم) نے حضرت اسماء کو اس حالت میں چھوڑا تھا کہ وہ آنسو بہا رہی تھی پھر آپ (صلی اللہ علیہ وآلہ وسلم) (دوبارہ) حضرت اسمائ کے پاس تشریف لائے اور ان سے تعزیت کی اور فرمایا : میرے پاس میرے بھتیجوں کو بلا کر لاؤ۔ راوی کہتے ہیں : پھر حضرت اسمائ ۔۔۔ پرندوں کے بچوں کی طرح کے ۔۔۔ تین بچے لے کر حاضر ہوئیں۔ اسماء کہتی ہیں۔ آپ (صلی اللہ علیہ وآلہ وسلم) نے نائی کو بلایا اور ان کے سرمنڈوائے اور فرمایا : ” محمد تو ہمارے چچا ابو طالب کے مشابہ ہے اور عون اللہ تو صورت و سیرت میں میرے مشابہ ہے۔ اور عبداللہ تھا۔ آپ (صلی اللہ علیہ وآلہ وسلم) نے اس کا ہاتھ پکڑا اور اس کو اوپر اٹھایا اور دعا فرمائی۔ اے اللہ ! عبداللہ کے دائیں ہاتھ کے سودے میں برکت دے۔ راوی کہتے ہیں : ان کی ماں حضرت اسمائ نے آپ (صلی اللہ علیہ وآلہ وسلم) سے ان کی (لاوارثی) کی شکایت کی تو آپ (صلی اللہ علیہ وآلہ وسلم) نے انھیں جواب دیا ۔ کیا تم ان کے ضائع ہونے کا خوف کھاتی ہو ؟ حالانکہ میں دنیا و آخرت میں ان کا ولی ہوں۔