(١٧٣٧٧) حضرت ابو سلمہ (رض) فرماتے ہیں کہ میں، حضرت ابن عباس اور حضرت ابوہریرہ (رض) ایک مجلس میں تھے۔ ہمارے درمیان مذاکرہ ہوا کہ اگر ایک عورت کا خاوند مرجائے اور وہ عورت خاوند کی وفات کے تھوڑے عرصے بعد بچے کو جنم دے تو اس کی عدت کا کیا حکم ہوگا ؟ میں نے کہا کہ اس کی عدت مکمل ہوجائے گی۔ حضرت عبداللہ بن عباس (رض) نے فرمایا کہ وضع حمل اور چار مہینے دس دن میں سے جو زیادہ ہو وہ اس کی عدت ہوگی۔ حضرت ابوہریرہ (رض) نے فرمایا کہ میں تو اپنے بھائی ابو سلمہ کے ساتھ ہوں۔ پھر انھوں نے حضرت ابن عباس (رض) کے غلام کریب کو حضرت ام سلمہ (رض) کے پاس بھیجا۔ حضرت ام سلمہ (رض) نے اس مسئلے کا فیصلہ کرتے ہوئے فرمایا کہ سبیعہ اسلمی (رض) نے اپنے خاوند کی وفات کے چالیس دن بعد بچے کو جنم دیا۔ بچے کی پیدائش کے بعد بنو عبد الدار کے ایک آدمی جن کی کنیت ابو سنابل تھی انھوں نے سبیعہ اسلمی (رض) کو نکاح کا پیغام دیا اور ان سے کہا کہ آپ کی عدت مکمل ہوچکی ہے۔ سبیعہ نے کسی اور سے نکاح کا ارادہ کیا تو ابوسنابل نے کہا کہ تمہاری عدت مکمل نہیں ہوئی۔ سبیعہ نے اس بات کا حضور (صلی اللہ علیہ وآلہ وسلم) سے تذکرہ کیا تو آپ نے انھیں شادی کرنے کی اجازت دے دی۔