(١٧٣٩١) حضرت مسروق (رض) اور حضرت عمرو بن عتبہ (رض) نے حضرت سبیعہ بنت حارث (رض) کو خط لکھا اور ان کے واقعے کے بارے میں پوچھا۔ انھوں نے جواب میں لکھا کہ انھوں نے اپنے خاوند کی وفات کے پچیس دن بعد بچے کو جنم دیا تھا۔ پھر وہ خیر کی تلاش میں تیار ہوگئیں۔ ابو سنابل بن بعکک (رض) کا ان کے پاس سے گزر ہوا تو انھوں نے کہا کہ تم نے بہت جلدی کی، دونوں عدتوں میں سے زیادہ طویل مدت کو گزارو یعنی چار مہینے دس دن۔ پھر وہ حضور (صلی اللہ علیہ وآلہ وسلم) کی خدمت میں حاضر ہوئی اور عرض کیا کہ اے اللہ کے رسول ! میرے لیے دعاء مغفرت فرما دیجئے۔ حضور (صلی اللہ علیہ وآلہ وسلم) نے فرمایا کہ کیا بات پیش آئی ؟ انھوں نے سارا قصہ سنایا تو حضور (صلی اللہ علیہ وآلہ وسلم) نے فرمایا کہ اگر تمہیں اچھا خاوند ملے تو اس سے شادی کرلو۔