(٢٠٩٣٥) حضرت عبداللہ بن صفوان کی اولاد کے ایک آدمی بیان کرتے ہیں کہ حضرت صفوان رسول اللہ (صلی اللہ علیہ وآلہ وسلم) کے پاس سے بھاگ گئے تھے، رسول اللہ (صلی اللہ علیہ وآلہ وسلم) نے ان کی طرف آدمی بھیجا، انھیں امان دیا اور انھوں نے اسلام قبول کرلیا، رسول اللہ (صلی اللہ علیہ وآلہ وسلم) حنین کی طرف جارہے تھے تو آپ نے ان سے فرمایا کہ اے صفوان تمہارے پاس ہتھیار ہیں ؟ انھوں نے کہا کہ عاریہ کے طور پر چاہیے یا غصب کے طور پر، حضور (صلی اللہ علیہ وآلہ وسلم) نے فرمایا کہ عاریہ کے طور پر، پس حضرت صفوان نے تیس زرہیں بطور عاریہ کے پیش کردیں، رسول اللہ (صلی اللہ علیہ وآلہ وسلم) نے حنین کی لڑائی لڑی، جب مشرکین کو شکست ہوگئی تو حضرت صفوان کی زرہیں جمع کی گئیں، چند زرہیں کم تھی، حضور (صلی اللہ علیہ وآلہ وسلم) نے فرمایا کہ اے صفوان ! ہم نے تمہاری کچھ زرہیں کھو دی ہیں، کیا ہم آپ کے لیے ان کی متبادل زرہوں کا انتظام کردیں ؟ حضرت صفوان نے فرمایا کہ نہیں اے اللہ کے رسول ! جو چیز میرے دل میں آج ہے پہلے کبھی نہ تھی۔