(٢٣٩٤٧) حضرت انس سے روایت ہے کہ حضرت ام سلیم کا ایک بچہ پیدا ہوا تو مجھے ابو طلحہ نے کہا۔ اس بچہ کو نبی پاک (صلی اللہ علیہ وآلہ وسلم) کے پاس لے جاؤ۔ پس یہ بچہ نبی کریم (صلی اللہ علیہ وآلہ وسلم) کی خدمت میں لایا گیا اور اس بچہ کے ہمراہ چند کھجوریں بھی بھیجی گئی تھیں۔ چنانچہ آپ (صلی اللہ علیہ وآلہ وسلم) نے اس بچہ کو لیا اور فرمایا ” اس کے ساتھ کوئی چیز ہے ؟ “ لوگوں نے جواب دیا۔ جی ہاں ! کھجوریں ہیں۔ اس پر نبی کریم (صلی اللہ علیہ وآلہ وسلم) نے کھجوریں لیں اور ان کو چبایا پھر آپ (صلی اللہ علیہ وآلہ وسلم) نے اپنے منہ مبارک سے (چبائی ہوئی کھجور) لی اور اس کو بچہ کے منہ میں ڈال دیا۔ پھر آپ (صلی اللہ علیہ وآلہ وسلم) نے اس کے تالو کو ملا اور اس کا نام آپ (صلی اللہ علیہ وآلہ وسلم) نے عبداللہ رکھا۔