(٢٩٣٦٢) حضرت نعیم بن ھزال فرماتے ہیں کہ ماعز بن مالک میرے والد کی پرورش میں تھے انھوں نے قبیلہ کی ایک باندی سے زنا کرلیا تو میرے والد نے ان سے کہا : تم رسول اللہ (صلی اللہ علیہ وآلہ وسلم) کے پاس جاؤ اور جو تم نے کیا ہے اس بارے میں آپ (صلی اللہ علیہ وآلہ وسلم) کو بتلاؤ وہ تمہارے لیے استغفار کریں گے۔ اور میرے والد نے اس سے یہ ارادہ کیا کہ آپ (صلی اللہ علیہ وآلہ وسلم) اس کے لیے کوئی راستہ نکالیں گے۔ پس وہ آپ (صلی اللہ علیہ وآلہ وسلم) کے پاس آیا اور کہا : یا رسول اللہ (صلی اللہ علیہ وآلہ وسلم) ! بیشک میں نے زنا کیا ہے آپ (صلی اللہ علیہ وآلہ وسلم) مجھ پر کتاب اللہ کا حکم قائم فرما دیں۔ آپ (صلی اللہ علیہ وآلہ وسلم) نے اس سے اعراض کیا پھر آپ (صلی اللہ علیہ وآلہ وسلم) کے پاس آئے یہاں تک کہ راوی نے چار مرتبہ کا ذکر کیا۔ پھر وہ آپ (صلی اللہ علیہ وآلہ وسلم) کے پاس چوتھی بار آئے اور کہا : یا رسول اللہ (صلی اللہ علیہ وآلہ وسلم) ! بیشک میں نے زنا کیا ہے آپ (صلی اللہ علیہ وآلہ وسلم) مجھ پر کتا باللہ کا حکم قائم فرما دیں اس پر رسول اللہ (صلی اللہ علیہ وآلہ وسلم) نے ارشاد فرمایا : کیا تم نے یہ بات چار مرتبہ نہیں کہی ؟ پس کس عورت سے کیا ؟ انھوں نے کہا : فلاں عورت سے آپ (صلی اللہ علیہ وآلہ وسلم) نے فرمایا : کیا تم نے اس سے ہمبستری کی ؟ انھوں نے کہا، جی ہاں ! آپ (صلی اللہ علیہ وآلہ وسلم) نے پوچھا : کیا تم نے اس سے وطی کی ؟ انھوں نے کہا، جی ہاں، ٓپ (صلی اللہ علیہ وآلہ وسلم) نے پھر پوچھا ! کیا تم نے اس سے جماع کیا ؟ انھوں نے کہا : جی ہاں، راوی کہتے ہیں آپ (صلی اللہ علیہ وآلہ وسلم) نے اس کے متعلق حکم دیا تو اس کو سنگسار کیا گیا اور اسے حرہ کی زمین کی طرف لے جایا گیا جب انھوں نے پتھروں کی سختی محسوس کی وہ کراہتے ہوئے تکلیف سے نکلنے لگے۔ حضرت عبداللہ بن انیس اس سے ملے اور تحقیق اس کو مارنے والے ساتھی عاجز آگئے تھے انھوں نے اپنے اونٹ کی پنڈلی کا پتلا حصہ اکھیڑا اور ان کو اس سے مار کر انھیں قتل کردیا۔ پھر وہ نبی کریم (صلی اللہ علیہ وآلہ وسلم) کی خدمت میں آئے اور آپ (صلی اللہ علیہ وآلہ وسلم) کے سامنے اس بات کا ذکر کیا۔ آپ (صلی اللہ علیہ وآلہ وسلم) نے فرمایا : تم نے اس کو چھوڑ کیوں نہیں دیا شاید کہ وہ توبہ کرلیتا اور اللہ اس کی توبہ قبول کرلیتے ؟