(٣٠٤٨١) حضرت نافع فرماتے ہیں کہ حضرت ابن عمر جب حج یا عمرہ کرنے کے لیے تشریف لاتے تو بیت اللہ کا طواف کرتے اور دو رکعت نماز پڑھتے۔ اور ان دونوں رکعات میں آپ کا بیٹھنا آپ کے قیام سے زیادہ لمبا ہوتا، آپ اپنے رب کی ثنا کرتے اور دعا مانگتے۔ پس جب آپ دو رکعات سے فارغ ہوجاتے تو صفا اور مروہ کے درمیان یوں دعا فرماتے : اے اللہ ! تو اپنے دین کے ذریعہ اور اپنی اطاعت و فرمان برداری اور اپنے رسول کی اطاعت و فرمان برداری کے ذریعہ میری حفاظت فرما۔ اے اللہ ! تو مجھے اپنی حدود میں پڑنے سے بچا لے۔ اے اللہ ! مجھے ان لوگوں میں سے بنا دے جن سے تو محبت کرتا ہے اور تیرے فرشتے اور تیرے رسول جن سے محبت کرتے ہیں اور تیرے نیک بندے بھی، اے اللہ ! تو مجھے اپنا محبوب بنا لے، اور اپنے فرشتوں اور اپنے رسولوں کی طرف محبوب کر دے، اے اللہ ! تو مجھے بھلائی عطا کر جو تو اپنے نیک بندوں کو دنیا اور آخرت میں عطا کرے گا۔ اے اللہ ! میرے لیے آسانی پیدا فرما۔ اور مجھے سختی سے بچا لے۔ اور دنیا اور آخرت میں میری مغفرت فرما، اے اللہ ! مجھے توفیق دے کہ میں تیرے اس وعدہ کو پورا کروں جو تو نے مجھ سے کیا، اے اللہ ! مجھے متقی پیشواؤں میں سے بنا دے، اور یوم حساب کو میری غلطیوں کی مغفرت فرما۔