(٣١٢١٧) حضرت قیس (رض) فرماتے ہیں کہ میں نے حضرت عبداللہ بن مسعود (رض) کو دیکھا کہ وہ حضرت سعد (رض) سے ان دراہم کا تقاضا کر رہے ہیں جو انھوں نے ان کو بیت المال سے قرض دیے تھے، حضرت سعد (رض) نے فرمایا کہ میں تمہیں برا ملاقاتی سمجھتا ہوں۔ حضرت ابن مسعود (رض) نے فرمایا وہ مال لوٹاؤ، انھوں نے فرمایا اے ابن مسعود ! کیا تم قبیلہ ہذیل کے ایک غلام نہیں ہو ؟ راوی فرماتے ہیں کہ اس پر حضرت ابن مسعود (رض) نے فرمایا کہ کیا تم حُمَینہ کے بیٹے نہیں ہو ؟ راوی کہتے ہیں کہ حضرت سعد (رض) کے بھتیجے نے فرمایا کہ بیشک تم دونوں البتہ رسول اللہ (صلی اللہ علیہ وآلہ وسلم) کے صحابی ہو لوگ تمہیں دیکھتے ہیں، چنانچہ حضرت سعد (رض) نے یہ کہتے ہوئے اپنے ہاتھ اٹھا لیے ” اے اللہ ! جو آسمانوں اور زمینوں کا پروردگار ہے “ حضرت ابن مسعود (رض) کہنے لگے جو چاہو کہو لیکن لعنت نہ کرنا، راوی کہتے ہیں کہ حضرت سعد (رض) نے فرمایا بخدا اگر اللہ کا خوف نہ ہوتا تو میں تم پر ایسی بد دعا کرتا جو تم سے خطا نہ کھاتی، راوی کہتے ہیں کہ حضرت ابن مسعود (رض) جیسے آئے تھے ایسے چل دیے۔