(٣٢٦٨٦) حضرت عمر بن جاوان (رض) فرماتے ہیں کہ حضرت احنف بن قیس (رض) نے ارشاد فرمایا : ہم لوگ مدینہ میں تھے کہ حضرت عثمان (رض) تشریف لائے۔ کہا گیا کہ یہ حضرت عثمان (رض) ہیں۔ آپ (رض) داخل ہوئے اس حال میں کہ آپ (رض) پر زرد رنگ کی چادر تھی جس سے آپ (رض) نے اپنا سر ڈھانپا ہوا تھا۔ آپ (رض) نے پوچھا : یہاں حضرت علی (رض) ہیں ؟ لوگوں نے عرض کیا : جی ہاں ! آپ (رض) نے پوچھا : یہاں حضرت طلحہ (رض) ہیں ؟ لوگوں نے عرض کیا : جی ہاں ! آپ (رض) نے پوچھا : یہاں حضرت زبیر (رض) ہیں ؟ لوگوں نے عرض کیا : جی ہاں ! آپ (رض) نے پوچھا : یہاں حضرت سعد (رض) ہیں ؟ لوگوں نے عرض کیا : جی ہاں ! آپ (رض) نے فرمایا : میں تم لوگوں کو قسم دے کر پوچھتا ہوں اس ذات کی جس کے سوا کوئی معبود برحق نہیں کہ کیا تم لوگ جانتے ہو رسول اللہ (صلی اللہ علیہ وآلہ وسلم) کے اس فرمان کو جو آپ (رض) نے ارشاد فرمایا : کہ جو شخص فلاں قبیلہ کے اونٹ کا باڑ ا خریدے گا تو اللہ اس کی مغفرت فرما دیں گے تو میں نے وہ باڑا بیس ہزار یا پچیس ہزار میں خریدا۔ پھر میں نبی کریم (صلی اللہ علیہ وآلہ وسلم) کی خدمت میں حاضر ہوا اور میں نے عرض کیا : تحقیق میں نے وہ باڑا خرید لیا۔ اس پر آپ (صلی اللہ علیہ وآلہ وسلم) نے ارشاد فرمایا : تم اس جگہ کو ہماری مسجد کے لیے وقف کردو اور اس کا اجر وثواب تمہیں ملے گا ؟ راوی کہتے ہیں : ان سب حضرات نے یک زبان ہو کر کہا : اللہ کی قسم ! ایسی ہی بات ہے۔
آپ (رض) نے فرمایا : میں تم لوگوں کو قسم دیتا ہوں اس اللہ کی جس کے سوا کوئی معبود برحق نہیں : کیا تم لوگ رسول اللہ (صلی اللہ علیہ وآلہ وسلم) کے اس فرمان کے متعلق جانتے ہو جو رسول اللہ (صلی اللہ علیہ وآلہ وسلم) نے ارشاد فرمایا کہ جو شخص رومہ میٹھے پانی کا کنواں خریدے گا تو اللہ اس کی مغفرت فرما دیں گے۔ تو میں نے اس کنویں کو اتنے اور اتنے روپوں میں خریدا ، پھر میں آپ (صلی اللہ علیہ وآلہ وسلم) کی خدمت میں حاضر ہوا میں نے عرض کیا : تحقیق میں نے اس کو خرید لیا تو آپ (صلی اللہ علیہ وآلہ وسلم) نے فرمایا : تم اسے مسلمانوں کے پینے کے لیے وقف کردو اور اس کا اجر تمہیں ملے گا ؟
راوی کہتے ہیں : ان سب حضرات نے یک زبان ہو کر فرمایا : اللہ کی قسم ! ایسی ہی بات ہے۔
آپ (رض) نے فرمایا : میں تم لوگوں کو قسم دے کر پوچھتا ہوں اس اللہ کی جس کے سوا کوئی معبود نہیں کیا تم لوگ رسول اللہ (صلی اللہ علیہ وآلہ وسلم) کے اس فرمان کو جانتے ہو جو آپ (صلی اللہ علیہ وآلہ وسلم) نے ارشاد فرمایا : اس حال میں کہ آپ (صلی اللہ علیہ وآلہ وسلم) لوگوں کے چہرے کی طرف دیکھ رہے تھے۔ کہ کون شخص ہے جو ان لوگوں کے سفر کا سامان مہیا کرے گا ۔ اللہ اس شخص کی مغفرت فرما دیں گے۔ یعنی غزوہ تبوک میں۔ تو میں نے ان سب کے لیے سامان مہیا کیا یہاں تک کہ ان لوگوں کو اونٹ کی نکیل اور اونٹ کے پیر کی رسی کی بھی کمی نہیں ہوئی ؟۔ ان سب حضرات نے یک زبان ہو کر فرمایا : اللہ کی قسم ! ایسی ہی بات ہے، آپ (رض) نے تین مرتبہ فرمایا : اے اللہ ! تو گواہ رہ۔