(٣٢٧٤١) حضرت عبدالرحمن بن سابط (رض) فرماتے ہیں کہ حضرت سعد (رض) نے ارشاد فرمایا : کہ حضرت معاویہ (رض) ایک حج کے موقع پر تشریف لائے تو حضرت سعد (رض) ان کے پاس آئے تو لوگوں نے حضرت علی (رض) کا ذکر کیا اس پر حضرت معاویہ (رض) نے کچھ الفاظ کہے پس حضرت سعد (رض) کو غصہ آگیا آپ (رض) نے فرمایا : تم یہ بات ایسے آدمی کے بارے میں کر رہے ہو کہ میں نے خود رسول اللہ (صلی اللہ علیہ وآلہ وسلم) کو اس کے بارے میں یہ تین خصوصیات ارشاد فرماتے ہوئے سنا۔ اور مجھے ان خصوصیات میں سے کسی ایک کامل جانا میرے نزدیک دنیا اور جو کچھ اس میں موجود ہے۔ اس سے بھی پسند ہے۔ میں نے سنا کہ رسول اللہ (صلی اللہ علیہ وآلہ وسلم) نے فرمایا : میں جس کا دوست ہوں۔ علی بھی اس کا دوست ہے۔ میں نے سنا کہ نبی کریم (صلی اللہ علیہ وآلہ وسلم) نے ارشاد فرمایا : تم میرے نزدیک ایسے ہی ہو جیسا کہ حضرت ہارون (علیہ السلام) حضرت موسیٰ (علیہ السلام) کے نزدیک تھے۔ مگر یہ کہ میرے بعد کوئی نبی نہیں۔ اور میں نے سنا کہ رسول اللہ (صلی اللہ علیہ وآلہ وسلم) نے ارشاد فرمایا : کہ میں ضرور بالضرور ایسے آدمی کو جھنڈا دوں گا جس سے اللہ اور اس کا رسول محبت کرتے ہیں۔