(٣٢٧٨٢) حضرت براء بن عازب (رض) فرماتے ہیں کہ رسول اللہ (صلی اللہ علیہ وآلہ وسلم) نے دو لشکر بھیجے جن میں سے ایک پر حضرت علی (رض) کو امیر بنایا اور دوسرے لشکر پر حضرت خالد بن ولید (رض) کو ، پھر ارشاد فرمایا : اگر لڑائی ہو تو اس صورت میں حضرت علی (رض) لوگوں پر امیر ہوں گے۔ پس حضرت علی (رض) نے قلعہ کو فتح کرلیا۔ اور ایک باندی کو اپنے لیے خاص کرلیا اس پر حضرت خالد (رض) نے خط لکھ کر اس بات کی حضور (صلی اللہ علیہ وآلہ وسلم) کو خبر دی۔ جب رسول اللہ (صلی اللہ علیہ وآلہ وسلم) نے یہ خط پڑھا تو ارشاد فرمایا : تم کیا کہتے ہو ایسے شخص کے بارے میں جو اللہ اور اس کے رسول (صلی اللہ علیہ وآلہ وسلم) کو محبوب رکھتا ہے۔ اور اللہ اور اس کا رسول (صلی اللہ علیہ وآلہ وسلم) اس کو محبو ب رکھتے ہیں۔