(٣٢٨٧٤) حضرت سالم (رض) فرماتے ہیں کہ حضرت سعید بن جبیر (رض) نے ارشاد فرمایا : جب حضرت حمزہ بن عبد المطلب اور حضرت مصعب بن عمیر (رض) غزوہ احد کے دن شہید ہوگئے اور انھوں نے جو ثواب و انعام دیکھنا تھا دیکھ لیا تو کہنے لگے۔ کاش ہمارے بھائی بھی اس کے بارے میں جان لیتے جو ہمیں ثواب و انعام ملا ہے تاکہ ان کے شوق میں مزید اضافہ ہوتا۔ تو اللہ رب العزت نے فرمایا : میں تمہاری طرف سے یہ پیغام ان کو پہنچاؤں گا ۔ پھر اللہ تعالیٰ نے یہ آیات نازل فرمائیں ! ترجمہ : اور تم ہرگز گمان مت کرو ان لوگوں کو مردہ جو اللہ کے راستہ میں قتل کردیے گئے بلکہ وہ اپنے رب کے ہاں زندہ ہیں اور رزق دیے جاتے ہیں۔ اللہ کے اس قول تک ۔۔۔ اور یقیناً اللہ مومنین کا اجر ضائع نہیں کرتا۔