(٣٢٩٨٥) حضرت واقد بن عمرو بن سعد بن معاذ (رض) فرماتے ہیں کہ جب میں اپنے بھائی کے ساتھ مدینہ آیا تو میں حضرت انس (رض) کے پاس داخل ہوا۔ اور میں نے ان کو سلام کیا۔ آپ (رض) نے پوچھا : تم کون ہو ؟ میں نے کہا : میں واقد بن عمرو بن سعد بن معاذ ہوں۔ آپ (رض) رونے لگے اور بہت روئے۔ پھر آپ (رض) نے فرمایا : یقیناً تم حضرت کے مشابہہ ہو۔ بیشک وہ لوگوں میں سب سے عظیم اور بڑے آدمی تھے۔ رسول اللہ (صلی اللہ علیہ وآلہ وسلم) نے اکیدر دومہ کی طرف ایک لشکر بھیجا تو اس نے آپ (صلی اللہ علیہ وآلہ وسلم) کو ایک جوڑا بھیجا جو ریشم کا تھا اور اس میں سونے کا کام ہو اتھا۔ پس رسول اللہ (صلی اللہ علیہ وآلہ وسلم) نے اس کو ملبوس فرمایا : تو لوگ اس کپڑے کو خوبصورتی کی وجہ سے ہاتھ لگا رہے تھے اس پر آپ (صلی اللہ علیہ وآلہ وسلم) نے فرمایا : کیا تم کو یہ اچھا لگا ؟ لوگوں نے کہا : اے اللہ کے رسول 5! ہم نے آج تک اس سے اچھا اور خوبصورت کوئی کپڑا نہیں دیکھا۔ رسول اللہ (صلی اللہ علیہ وآلہ وسلم) نے فرمایا : سعد (رض) کے رومال جنت میں اس سے بھی خوبصورت ہیں جو کپڑا تم دیکھ رہے ہو۔