(٣٣٠٠٠) حضرت منصور (رض) فرماتے ہیں کہ حضرت مجاہد (رض) نے ارشاد فرمایا : سب سے پہلے اسلام ظاہر کرنے والے سات لوگ تھے۔ حضرت رسول اللہ (صلی اللہ علیہ وآلہ وسلم) ، حضرت ابوبکر (رض) ، حضرت بلال (رض) ، حضرت خباب (رض) ، حضرت صھیب (رض) ، حضرت عمار (رض) ، حضرت سمیہ (رض) جو حضرت عمار (رض) کی والدہ ہیں۔ بہرحال رسول اللہ (صلی اللہ علیہ وآلہ وسلم) کی حفاظت ان کے چچا نے کی، اور ابوبکر (رض) کی حفاظت ان کی قوم نے کی، باقی سب لوگوں کو پکڑ لیا گیا اور پھر کافروں نے انھیں لوہے کی زرہیں پہنائیں پھر ان کو سورج کی تپش میں ڈال دیا۔ یہاں تک کہ ان میں سے ایک کو انتہاء کی مشقتیں برداشت کرنا پڑیں پس ان لوگوں نے ان کو ہر چیز دی جو انھوں نے مانگی۔ ان میں سے ہر ایک آدمی کی طرف قوم کے افراد چمڑے کے بڑے مشکیزے میں پانی لاتے اور ان کو اس میں ڈال دیتے۔ پھر ان کو پہلوؤں سے اٹھا لیتے، سوائے حضرت بلال (رض) کے۔ کفار نے ان کی گردن میں رسی ڈالی پھر بچوں کو حکم دیا کہ وہ ان کو مکہ کے دو پہاڑوں کے درمیان گھسیٹیں۔ اس حال میں بھی آپ (رض) کہہ رہے ہوتے۔ اَحَد اَحَد ، اللہ ایک ہے۔