(٣٣٧٠٢) حضرت ابن عون (رض) فرماتے ہیں کہ قبیلہ بنو زریق کے ایک شخص نے بیان کیا کہ حضرت ابوبکر (رض) نے حضرت طلحہ (رض) کے نام ایک زمین کردی اور ان کے لیے اس بارے میں ایک تحریر بھی لکھ دی اور اس پر گواہ بھی بنا دیے جن میں حضرت عمر بھی شامل تھے۔ حضرت طلحہ (رض) تحریر لے کر حضرت عمر (رض) کے پاس آئے اور کہا : اس پر مہر لگا دو ۔ آپ (رض) نے فرمایا : میں اس پر مہر نہیں لگاؤں گا ۔ کیا یہ لوگوں کو چھوڑ کر صرف تیرے لیے ہے ؟ راوی کہتے ہیں : حضرت طلحہ (رض) چلے گئے اس حال میں کہ وہ بہت غصہ میں تھے ۔ پس وہ حضرت ابوبکر (رض) کے پاس آئے اور فرمایا : اللہ کی قسم ! میں نہیں جانتا کہ تم خلیفہ ہو یا عمر ؟ آپ (رض) نے فرمایا : نہیں ! بلکہ عمر (رض) نے تو صرف انکار کیا ہے !