(٣٣٨٢٥) حضرت عبد الرحمن بن عبید (رض) فرماتے ہیں کہ ان کے والد حضرت عبید (رض) نے ارشاد فرمایا : کہ کچھ لوگ تھے جو عطیات اور تنخواہیں لیتے تھے اور لوگوں کے ساتھ نماز پڑھتے تھے اور پوشیدگی میں بتوں کی پوجا کرتے تھے۔ ان لوگوں کو حضرت علی (رض) بن ابی طالب کے پاس لایا گیا تو آپ (رض) نے ان کو مسجد میں یا جیل خانہ میں قید کردیا۔ پھر فرمایا : اے لوگو ! تمہاری کیا رائے ہے۔ ان لوگوں کے بارے میں جو تمہارے ساتھ عطیات اور تنخواہیں لیتے ہیں اور ان بتوں کی پوجا کرتے ہیں ؟ لوگوں نے کہا : آپ (رض) ان کو قتل کردیں۔ آپ (رض) نے فرمایا : نہیں ! بلکہ میں ان کے ساتھ وہی معاملہ کروں گا جو انھوں نے ہمارے جدامجد حضرت ابراہیم (علیہ السلام) کے ساتھ کیا تھا۔ پس آپ (رض) نے ان کو آگ میں جلا دیا۔