(٣٧٢٨٩) حضرت جابر بیان کرتے ہیں کہ رسول اللہ (صلی اللہ علیہ وآلہ وسلم) اپنے گھوڑے سے گرپڑے اور کھجور کے تنے پر گرے اور آپ (صلی اللہ علیہ وآلہ وسلم) کے قدم مبارک سوج گئے۔ راوی کہتے ہیں : ہم آپ (صلی اللہ علیہ وآلہ وسلم) کی عیادت کے لیے آپ (صلی اللہ علیہ وآلہ وسلم) کے ہاں حاضر ہوئے تو آپ (صلی اللہ علیہ وآلہ وسلم) حضرت عائشہ کے مشربہ میں بیٹھ کر نماز پڑھ رہے تھے۔ ہم نے آپ (صلی اللہ علیہ وآلہ وسلم) کی اقتدا میں نماز پڑھی درآنحالیکہ ہم کھڑے تھے پھر ہم دوسری مرتبہ آپ (صلی اللہ علیہ وآلہ وسلم) کی خدمت میں حاضر ہوئے اور آپ (صلی اللہ علیہ وآلہ وسلم) بیٹھ کر نماز پڑھ رہے تھے۔ ہم نے آپ (صلی اللہ علیہ وآلہ وسلم) کی اقتدا میں کھڑے ہو کر نماز پر ھنا شروع کی تو آپ (صلی اللہ علیہ وآلہ وسلم) نے ہمیں بیٹھنے کا اشارہ فرمایا۔ پس جب آپ (صلی اللہ علیہ وآلہ وسلم) نماز پڑھ چکے تو ارشاد فرمایا : امام اسی لیے بنایا جاتا ہے کہ اس کی اقتدا کی جائے، سو جب وہ کھڑے ہو کر نماز پڑھے تو تم بھی کھڑے ہو کر نماز پڑھو اور جب وہ بیٹھ کر نماز پڑھے تو تم بھی بیٹھ کر نماز پڑھو۔ امام بیٹھا ہو تو تم کھڑے نہ ہو جیسا کہ اہل فارس اپنے بڑوں کے ساتھ کرتے ہیں۔