(٣٧٩٥١) حضرت عائشہ سے روایت ہے کہ میں خندق کے دن، لوگوں کے آثار قدم کی پیروی کرتے ہوئے باہر نکلی۔ پس میں نے اپنے پیچھے لوگوں کی آہٹ سُنی۔ میں نے توجہ کی تو وہ سعد بن عبادہ تھے اور ان کے ساتھ ان کے بھتیجے حارث بن اوس تھے۔ جنہوں نے اپنی ڈھال اٹھائی ہوئی تھی۔ پس میں زمین پر بیٹھ گئی ۔ فرماتی ہیں : پس حضرت سعد گزر گئے اور انھوں نے زرہ پہنی ہوئی تھی۔ اور اس کے کنارے باہر نکلے ہوئے تھے۔ اور مجھے حضرت سعد کے کناروں سے خوف آ رہا تھا۔ فرماتی ہیں : یہ صاحب لوگوں میں سے بڑے جثہ والے اور لمبے تھے۔ فرماتی ہیں : پھر وہ رجز پڑھتے ہوئے اور یہ کہتے ہوئے گزر گئے۔
” تھوڑی دیر ٹھہر جاؤ جنگ کو زور پکڑنے دو ۔ جب وقت مقرر آجائے تو موت کتنی اچھی ہوتی ہے۔ “
٢۔ فرماتی ہیں۔ پھر میں کھڑی ہوئی اور ایک باغیچہ میں گھس گئی تو وہاں مسلمانوں کے چند افراد تھے۔ جن میں عمر بن خطاب بھی تھے اور ان میں ایک آدمی وہ بھی تھا جس پر خود تھی ۔ راوی کہتے ہیں۔۔۔ حضرت عمر نے کہا : عجیب بات ہے ! تمہیں کیا چیز لے آئی ہے ؟ عجیب بات ہے ! تمہیں کیا چیز لے آئی ہے ؟ بخدا ! تم بہت جری ہو۔ تمہیں کس چیز نے فرار اور آزمائش سے مامون کردیا ہے ؟ عائشہ فرماتی ہیں : حضرت عمر مجھے مسلسل ملامت کرتے رہے یہاں تک کہ میں نے تمنا کی کہ زمین شق ہوجائے اور میں اس میں داخل ہو جاؤں۔ فرماتی ہیں۔ پھر (دوسرے) آدمی نے اپنے چہرے سے خود اتاری تو وہ طلحہ بن عبید اللہ تھے۔ راوی کہتے ہیں : انھوں نے کہا : اے عمر ! تم پر افسوس ہے آج تم نے بہت زیادہ ملامت کی ہے۔ فرار اور آزمائش اللہ کے سوا کس کی طرف ہوسکتا ہے۔
٣۔ عائشہ فرماتی ہیں۔ مشرکین قریش میں سے ایک آدمی نے، جس کو حبان بن العرقۃ کہا جاتا تھا۔ حضرت سعد کو تیر مارا اور کہا۔ اس کو لے لو۔ میں ابن العرقۃ ہوں۔ وہ تیر حضرت سعد کی بازو کی رگ میں لگا اور اس نے وہ رگ کاٹ دی۔ سعد نے اللہ سے دعا کی ۔ اے اللہ ! تو مجھے موت نہ دینا یہاں تک کہ تو بنو قریظہ سے میری آنکھوں کو ٹھنڈا کر دے۔ یہ لوگ سعد کے جاہلیت میں حلیف اور ساتھی تھے۔ عائشہ کہتی ہیں۔ پھر ان کے زخم کا خون بند ہوگیا۔ اور اللہ تعالیٰ نے مشرکین پر ہوا بھیج دی۔ وکفی اللّٰہ المؤمنین القتال وکان اللّٰہ قویاً عزیزاً ۔
پس ابو سفیان تہامہ کے علاقہ کے ساتھ جا ملا اور عیینہ بن بدر بن حصن اور اس کے ساتھی نجد کے علاقہ کے ساتھ جا ملے اور بنو قریظہ واپس ہوگئے اور اپنے قلعوں میں قلعہ بند ہوگئے اور رسول اللہ (صلی اللہ علیہ وآلہ وسلم) مدینہ کی طرف واپس تشریف لے آئے اور حکم دیا تو حضرت سعد کے لیے مسجد میں خیمہ لگایا گیا اور آپ (صلی اللہ علیہ وآلہ وسلم) نے اسلحہ وغیرہ رکھ دیا۔
٤۔ حضرت عائشہ فرماتی ہیں۔ پھر آپ (صلی اللہ علیہ وآلہ وسلم) کے پاس حضرت جبرائیل آئے اور عرض کیا۔ کیا آپ نے اسلحہ اتار دیا ہے ؟ بخدا ! فرشتوں نے تو اسلحہ نہیں اتارا۔ پس آپ بنو قریظہ کی طرف چلئے اور ان سے قتال کیجئے۔ تو نبی کریم (صلی اللہ علیہ وآلہ وسلم) نے کوچ کا حکم دیا اور آپ (صلی اللہ علیہ وآلہ وسلم) نے اپنا سامانِ حضر زیب تن فرمایا اور نکل پڑے ۔ اور (جب) آپ (صلی اللہ علیہ وآلہ وسلم) بنو غنم کے پاس سے گزرے۔۔۔ یہ لوگ مسجد کے پڑوسی تھے ۔۔۔ تو پوچھا : کون تمہارے پاس سے گزرا ہے ؟ انھوں نے جواباً عرض کیا۔ ہمارے پاس سے حضرت دحیہ کلبی گزرے ہیں۔ حضرت دحیہ کی داڑھی اور چہرے کی شکل حضرت جبرائیل سے مشابہ تھی پھر نبی کریم (صلی اللہ علیہ وآلہ وسلم) ، بنو قریظہ کے پاس پہنچے اور آپ (صلی اللہ علیہ وآلہ وسلم) نے پچیس دن تک ان کا محاصرہ فرمایا۔ پس جب بنو قریظہ کا محاصرہ شدید ہوگیا اور ان پر مصیبت سخت ہوگئی تو انھیں کہا گیا ۔ رسول اللہ (صلی اللہ علیہ وآلہ وسلم) کے فیصلہ پر تسلیم ہو جاؤ۔ انھوں نے ابو لبابہ سے مشورہ کیا تو انھوں نے اپنے ہاتھ سے انھیں یہ اشارہ کیا کہ فیصلہ تو ذبح کا ہے۔ بنو قریظہ نے کہا۔ ہم ابن معاذ کے فیصلہ پر اترتے ہیں۔ آپ (صلی اللہ علیہ وآلہ وسلم) نے فرمایا : تم سعد بن معاذ کے فیصلہ پر (ہی) اُتر آؤ۔ پس وہ لوگ اتر آئے۔
٥۔ رسول اللہ (صلی اللہ علیہ وآلہ وسلم) نے حضرت سعد کی طرف کسی کو بھیجا اور انھیں گدھے پر سوار کیا گیا جس پر کھجور کی چھال کا پالان تھا اور ان کی قوم نے انھیں گھیر لیا۔ اور یہ کہنے لگے۔ اے ابو عمرو ! (یہ لوگ) تیرے حلیف اور تیرے ساتھی ہیں۔ اور تیری پہچان کے لوگ ہیں۔ عائشہ کہتی ہیں۔ حضرت سعد نے ان کو کچھ جواب نہیں دیا۔ یہاں تک کہ جب سعد ان کے گھروں کے پاس پہنچے تو فرمایا : اب سعد کے لیے وہ وقت آپہنچا ہے کہ سعد ، اللہ کے بارے میں کسی ملامت کرنے والے کی ملامت کی پروا نہ کرے۔
٦۔ پھر جب وہ رسول اللہ (صلی اللہ علیہ وآلہ وسلم) کے سامنے ہوئے ابو سعید کہتے ہیں۔ آپ (صلی اللہ علیہ وآلہ وسلم) نے فرمایا : اپنے سردار کے لیے کھڑے ہو جاؤ اور اس کو نیچے اتارو۔ حضرت عمر نے کہا۔ ہمارا سردار اللہ تعالیٰ ہے۔ آپ (صلی اللہ علیہ وآلہ وسلم) نے فرمایا : انھیں اتارو۔ پس لوگوں نے انھیں نیچے اتارا۔
٧۔ آپ (صلی اللہ علیہ وآلہ وسلم) نے حضرت سعد سے فرمایا : ان کے بارے میں فیصلہ کرو۔ انھوں نے عرض کیا : میں ان کے بارے میں یہ فیصلہ صادر کرتا ہوں کہ ان کے لڑنے والوں کو قتل کردیا جائے اور ان کی عورتوں ، بچوں کو قیدی بنایا جائے اور ان کے اموال کو تقسیم کرلیا جائے۔ نبی کریم (صلی اللہ علیہ وآلہ وسلم) نے ارشاد فرمایا۔ بیشک تو نے ان کے بارے میں اللہ اور اس کے رسول کے فیصلہ کے مطابق (ہی) فیصلہ کیا ہے۔ راوی کہتے ہیں : پھر حضرت سعد نے اللہ سے دعا کی۔ اور فرمایا۔ اے اللہ ! اگر تو نے اپنے نبی کے خلاف قریش کی کوئی جنگ باقی رکھی ہوئی ہے تو تُو مجھے بھی اس کے لیے باقی رکھ۔ اور اگر تو نے نبی (صلی اللہ علیہ وآلہ وسلم) اور قریش کے درمیان جنگ ختم کردی ہے تو تو مجھے اپنی طرف اٹھا لے۔ راوی کہتے ہیں۔ پس ان کا زخم پھوٹ پڑا۔ اور وہ زخم (پہلے) ختم ہوگیا تھا اور صرف ایک چھوٹے سے سوراخ جتنا رہ گیا تھا۔
٨۔ عائشہ کہتی ہیں۔ پھر رسول اللہ (صلی اللہ علیہ وآلہ وسلم) واپس تشریف لے آئے اور حضرت سعد بھی اس خیمہ میں واپس آگئے جو آپ (صلی اللہ علیہ وآلہ وسلم) نے ان کے لیے لگوایا تھا۔ فرماتی ہیں : پھر سعد کے پاس نبی کریم (صلی اللہ علیہ وآلہ وسلم) اور حضرت ابوبکر حضرت عمر حاضر ہوئے۔ کہتی ہیں : قسم اس ذات کی جس کے قبضہ میں میری جان ہے میں حضرت ابوبکر کے رونے کو حضرت عمر کے رونے سے علیحدہ پہچان لیتی تھی حالانکہ میں حجرہ میں ہوتی تھی ۔ اور یہ صحابہ ایسے تھے جیسا اللہ کا ارشاد ہے۔ رحماء بینھم علقمہ کہتے ہیں۔ میں نے کہا۔ اماں جان ! آپ (صلی اللہ علیہ وآلہ وسلم) کیا کرتے تھے ؟ عائشہ نے فرمایا : آپ (صلی اللہ علیہ وآلہ وسلم) کی آنکھں ل کسی پر آنسو نہیں بہاتی تھیں لیکن آپ (صلی اللہ علیہ وآلہ وسلم) کو جب کسی کا غم ہوتا تو آپ (صلی اللہ علیہ وآلہ وسلم) اپنی داڑھی پکڑتے تھے۔