(٣٧٩٩٤) حضرت ہشام، اپنے والد سے روایت کرتے ہیں۔ کہ رسول اللہ (صلی اللہ علیہ وآلہ وسلم) حدیبیہ کی طرف چلے۔ واقعہ حدیبیہ ماہ شوال میں پیش آیا تھا۔ راوی کہتے ہیں : پس رسول اللہ (صلی اللہ علیہ وآلہ وسلم) چل پڑے یہاں تک کہ جب آپ (صلی اللہ علیہ وآلہ وسلم) عسفان مقام پر پہنچے تو آپ (صلی اللہ علیہ وآلہ وسلم) کو بنی کعب کا ایک آدمی ملا اور اس نے کہا۔ یا رسول اللہ (صلی اللہ علیہ وآلہ وسلم) ! ہم نے قریش کو اس حالت میں چھوڑا ہے کہ انھوں نے آپ کے لیے اپنے مختلف النسل لوگوں کو جمع کیا ہے اور نہیں خزیر (قیمہ اور آٹا کا مرکب) کھلاتے ہیں۔ ان کا ارادہ یہ ہے کہ وہ آپ کو بیت اللہ سے روک دیں گے۔ پس آپ (صلی اللہ علیہ وآلہ وسلم) نکل پڑے یہاں تک کہ آپ (صلی اللہ علیہ وآلہ وسلم) عسفان مقام سے باہر تشریف لائے تو آپ (صلی اللہ علیہ وآلہ وسلم) کو قریش کے جاسوس خالد بن ولید ملے اور راستہ میں ان کا آپ (صلی اللہ علیہ وآلہ وسلم) سے آمنا سامنا ہوگیا۔ رسول اللہ (صلی اللہ علیہ وآلہ وسلم) نے (صحابہ کو) فرمایا : ادھر آ جاؤ ! پس آپ (صلی اللہ علیہ وآلہ وسلم) دو درختوں کے درمیان ہوگئے اور آپ (صلی اللہ علیہ وآلہ وسلم) ہموار راستہ سے ہٹ گئے یہاں تک کہ آپ (صلی اللہ علیہ وآلہ وسلم) غمیم پہنچے۔
٢۔ پس جب آپ (صلی اللہ علیہ وآلہ وسلم) غمیم میں فروکش ہوئے تو آپ (صلی اللہ علیہ وآلہ وسلم) نے لوگوں کو خطاب فرمایا۔ آپ (صلی اللہ علیہ وآلہ وسلم) نے اللہ تعالیٰ کی تعریف کی اور اللہ تعالیٰ کے شایان شان، ثنا بیان کی۔ پھر آپ (صلی اللہ علیہ وآلہ وسلم) نے ارشاد فرمایا : اما بعد ! بلاشبہ قریش نے تمہارے لیے اپنے متفرق گروہوں کو جمع کیا ہے اور اس کو خزیر (خاص مرکب غذا) کھلانا شروع کیا ہے۔ اور ان کا ارادہ یہ ہے کہ وہ ہمیں بیت اللہ سے روک ڈالیں۔ تو تم مجھے اپنی رائے سے مطلع کرو ؟ تم لوگ سردار (یعنی اہل مکہ) کی طرف (مقابلہ کے لئے) جانا چاہتے ہو یا تم لوگ ان کے معاونین کی طرف (مقابلہ کے لئے) جانا چاہتے ہو تاکہ ہم ان کو واپس ان کی عورتوں اور بچوں کے پاس پہنچا دیں۔ پس اگر وہ بیٹھ جائیں گے تو وہ اس حالت میں بیٹھیں گے کہ وہ بےبس اور شکست خوردہ ہوں گے۔ اور اگر وہ ہم سے (مقابلہ کا) مطالبہ کریں گے تو وہ ہم سے ایک کمزور اور نرم مطالبہ کریں گے پھر اللہ تعالیٰ انھیں رسوا کر دے گا۔
٣۔ حضرت ابوبکر نے فرمایا : یا رسول اللہ (صلی اللہ علیہ وآلہ وسلم) ! ہماری رائے تو یہ ہے کہ ہم سردار کی طرف پیش قدمی کرتے ہیں۔ کیونکہ اللہ تعالیٰ آپ (صلی اللہ علیہ وآلہ وسلم) کے معین ہیں اور آپ کے مددگار ہیں اور آپ کو غالب کرنے والے ہیں۔ حضرت مقداد بن الاسود نے فرمایا۔۔۔ جبکہ وہ اپنے کجاوہ میں تھے۔۔۔ بخدا ! یا رسول اللہ (صلی اللہ علیہ وآلہ وسلم) ! ہم آپ سے ایسی بات نہیں کہیں گے جیسا کہ بنی اسرائیل نے اپنے نبی (صلی اللہ علیہ وآلہ وسلم) سے کہی تھی کہ { اذْہَبْ أَنْتَ وَرَبُّکَ فَقَاتِلاَ ، إِنَّا ہَاہُنَا قَاعِدُونَ } بلکہ ہم تو کہیں گے۔ آپ اور آپ کا رب جا کر لڑے اور ہم آپ کے ہمراہ لڑیں گے۔
٤۔ پس رسول اللہ (صلی اللہ علیہ وآلہ وسلم) (وہاں سے) نکلے یہاں تک کہ جب آپ (صلی اللہ علیہ وآلہ وسلم) حرم کے قریب پہنچے اور اس کی حدود میں داخل ہوئے تو آپ (صلی اللہ علیہ وآلہ وسلم) کی جدعاء اونٹنی بیٹھ گئی۔ لوگوں نے کہا۔ یہ اونٹنی اڑ گئی ہے۔ آپ (صلی اللہ علیہ وآلہ وسلم) نے فرمایا : خدا کی قسم ! اونٹنی اڑی نہیں ہے اور نہ ہی اڑنا اس کی عادت ہے بلکہ اس کو تو اس ذات نے روکا ہے جس نے ہاتھیوں کو مکہ سے روکا تھا۔ (پھر آپ (صلی اللہ علیہ وآلہ وسلم) نے فرمایا) (اگر) قریش مجھے تعظیم محارم کے لیے دعوت دیں گے تو وہ اس عمل میں مجھ پر سبقت نہیں پاسکیں گے (آپ (صلی اللہ علیہ وآلہ وسلم) نے صحابہ سے فرمایا) ادھر آؤ۔ پھر آپ (صلی اللہ علیہ وآلہ وسلم) نے ذات الحنظل نامی چوٹی کے دائیں جانب کا راستہ پکڑ لیا یہاں تک کہ آپ (صلی اللہ علیہ وآلہ وسلم) حدیبیہ پر پہنچے۔ پس جب آپ (صلی اللہ علیہ وآلہ وسلم) نے وہاں پر پڑاؤ ڈالا تو لوگوں نے ایک کنواں سے پانی لینا شروع کیا۔ ابھی تمام لوگ سیراب نہیں ہوئے تھے کہ کنواں خالی ہوگیا ۔ لوگوں نے آپ (صلی اللہ علیہ وآلہ وسلم) کے سامنے اس بات کی شکایت کی۔ تو آپ (صلی اللہ علیہ وآلہ وسلم) نے لوگوں کو ترکش میں سے ایک تیر نکال کردیا اور فرمایا : اس تیر کو کنویں میں گاڑھ دو ۔ لوگوں نے اس تیر کو کنویں میں گاڑا تو کنواں پانی سے ابلنے لگا اور اس کا پانی اوپر آگیا یہاں تک کہ لوگ خوب سیراب ہوگئے۔
٥۔ جب قریش کو اس بات کی خبر ہوئی تو انھوں نے آپ (صلی اللہ علیہ وآلہ وسلم) کی طرف بنو حلیس کے بھائی کو بھیجا۔۔۔ یہ اس قوم کا فرد تھا جن کے ہاں ہدی کی تعظیم ہوتی تھی ۔۔۔ آپ (صلی اللہ علیہ وآلہ وسلم) نے فرمایا : ہدی کو کھڑا کردو۔ پس جب اس نے ہدی (کے جانور کو) دیکھا تو کوئی بھی بات نہیں کی۔ اور اپنی جگہ سے ہی قریش کی طرف پھر گیا۔ اور (جا کر) کہا : اے میری قوم ! قلائد، اونٹ اور ہدی کے جانوروں (کا احترام کرو) ۔ اس نے قریش کو خوب ڈرایا اور ان پر کڑی تنقید کی قریش نے اس کو گالیاں دیں اور اس سے ترش رو ہوگئے اور کہنے لگے۔ تم تو بیوقوف دیہاتی ہو۔ ہمیں تم سے کوئی تعجب نہیں ہے۔ بلکہ تجھے بھیجنے پر ہمیں اپنے آپ پر تعجب ہے۔ بیٹھ جاؤ۔
٦۔ پھر قریش نے عروہ بن مسعود کو کہا۔ تم محمد (صلی اللہ علیہ وآلہ وسلم) کی طرف جاؤ اور ہم تمہارے پیچھے نہیں آئیں گے تو عروہ (وہاں سے) نکلا یہاں تک کہ آپ (صلی اللہ علیہ وآلہ وسلم) کے پاس آیا اور کہا۔ اے محمد ! میں نے سارے عرب میں کوئی ایسا آدمی نہیں دیکھا جو آپ کی طرح (بھروسہ کر کے) چلا ہو ۔ تم مختلف لوگوں کو لے کر اپنے اس قوم و قبیلہ کی طرف آئے ہو۔ یقین کرو ! میں تمہارے پاس کعب بن لوی، اور عامر بن لوی کے ہاں سے آیا ہوں۔ انھوں نے اپنے بیوی بچوں کے سامنے چیتوں کا لباس پہن کر اللہ کے نام کی قسمیں کھائی ہیں۔ کہ : آپ ان کے سامنے جو بات رکھو گے وہ اس سے بھی سخت تر بات آپ کے سامنے رکھیں گے۔
٧۔ رسول اللہ (صلی اللہ علیہ وآلہ وسلم) نے ارشاد فرمایا : ہم لوگ لڑنے کے لیے نہیں آئے بلکہ ہمارا ارادہ تو یہ ہے کہ ہم اپنا عمرہ پوراکریں گے اور اپنے ہدی کے جانور نحر کریں۔ تو کیا تم اپنی قوم کے پاس جاؤ گے کیونکہ وہ بھی پالان والے (یعنی کمزور) ہیں اور جنگیں انھیں بھی کھا چکی ہیں۔ اور ان کے لیے بھی اس بات میں کوئی خیر نہیں ہے کہ جنگ ان کو مزید کھائے۔ پس وہ میرے اور بیت اللہ کے درمیان سے ہٹ جائیں تاکہ ہم اپنا عمرہ ادا کریں اور اپنے ہدی کے جانور نحر کریں۔ اور یہ لوگ میرے اور اپنے درمیان ایک مدت رکھ لیں۔ اور یہ لوگ میرے اور لوگوں کے درمیان سے ہٹ جائیں۔ خدا کی قسم ! میں تو اس معاملہ (کلمہ کے معاملہ) میں ہر سُرخ اور سیاہ کے ساتھ لڑوں گا یہاں تک کہ اللہ تعالیٰ مجھے غالب کر دے یا میں خود بھی اس راہ میں قتل کردیا جاؤں۔ پس اگر لوگ مجھے قتل کردیں گے تو یہی لوگوں کی مراد ہے اور اگر اللہ تعالیٰ مجھے ان پر غلبہ دے تو پھر انھیں اختیار ہوگا یا تو خوب تیاری کے ساتھ لڑیں گے اور یا فوج در فوج اسلام میں داخل ہوجائیں گے۔
٨۔ راوی کہتے ہیں : پھر عروہ، قریش کی طرف واپس آیا اور اس نے کہا۔ یقین کرلو ! بخدا ! مجھے روئے زمین پر تم سے زیادہ محبوب کوئی قوم نہیں ف۔ تم مجھے تمام لوگوں سے زیادہ محبوب ہو اور میرے بھائی ہو۔۔۔ اور میں نے مجامع میں تمہاری مدد کے لیے لوگوں کو بلایا لیکن جب وہ لوگ تمہاری مدد کے لیے نہیں آئے۔ تو میں اپنے گھر والوں کے ساتھ تمہارے پاس آگیا اور میں نے یہ سوچ کر تمہارے ہاں پڑاؤ ڈالا تاکہ میں تمہارے لیے مواسات کرسکوں۔ خدا کی قسم ! تمہارے بعد مجھے زندگی سے کوئی محبت نہیں ہے۔ تم لوگ یقین کرلو ! کہ اس آدمی (محمد (صلی اللہ علیہ وآلہ وسلم) ) نے انصاف کی بات پیش کی ہے تم اس بات کو قبول کرلو۔ یقین کرو ! میں کئی بادشاہوں کے ہاں گیا ہوں اور میں نے کئی وڈیروں کو دیکھا ہے میں بقسم یہ بات کہتا ہوں کہ میں نے کوئی بادشاہ یا وڈیرہ، اپنے ساتھیوں میں اتنا باعظمت نہیں دیکھا جتنا آپ کو دیکھا۔ آپ سے اجازت حاصل کئے بغیر کوئی آدمی گفتگو نہیں کرتا۔ جب آپ اجازت گفتگو دیتے ہیں تو بولنے والا بولتا ہے اور اگر آپ اجازت نہیں ا دیتے تو خاموش رہتا ہے پھر جب آپ وضو کرتے ہیں تو آپ کے ساتھی آپ کے دھو ون کو جلدی سے ہاتھوں ہاتھ لیتے ہیں اور اپنے سروں پر بہاتے ہیں اور اس کو برکت کی چیز سمجھتے ہیں۔
٩۔ پس جب اہل مکہ نے اس کی بات سُنی تو انھوں نے آپ (صلی اللہ علیہ وآلہ وسلم) کی طرف سہیل بن عمرو اور مکرز بن حفص کو بھیجا اور کہا۔ تم لوگ محمد (صلی اللہ علیہ وآلہ وسلم) کی طرف جاؤ پھر اگر وہ تمہیں وہی کچھ (تأثر) دے جو عروہ نے ذکر کیا ہے تو تم اس کو یہ فیصلہ سُنا دینا کہ وہ اس سال ہمارے ہاں سے لوٹ جائں ۔ اور بیت اللہ تک نہ آئیں تاکہ جو کوئی عربی بھی ان کے سفر عمرہ کے بارے میں سُنے تو وہ یہ بات بھی سُنے کہ ” ہم نے اس (محمد) کو بیت اللہ سے روک دیا ہے “ سہیل اور مکرز چل پڑے یہاں تک کہ وہ آپ (صلی اللہ علیہ وآلہ وسلم) کی خدمت میں پہنچے اور انھوں نے یہ بات آپ (صلی اللہ علیہ وآلہ وسلم) سے ذکر کی۔ آپ (صلی اللہ علیہ وآلہ وسلم) نے ان کو ان کے سوال کے مطابق جواب عطا فرمایا اور کہا۔ لکھو : بسم اللہ الرحمن الرحیم۔ وہ کہنے لگے ۔ بخدا ! یہ الفاظ تو ہم کبھی بھی نہیں لکھیں گے۔ آپ (صلی اللہ علیہ وآلہ وسلم) نے پوچھا۔ پھر کیا لکھو گے ؟ انھوں نے کہا۔ ہم تو یہ الفاظ لکھیں گے۔ باسمک اللّٰھم۔ آپ (صلی اللہ علیہ وآلہ وسلم) نے فرمایا : یہی لکھ لو۔ پھر انھوں نے یہ جملہ لکھا۔ پھر آپ (صلی اللہ علیہ وآلہ وسلم) نے فرمایا : لکھو، کہ یہ وہ تحریر ہے جس پر محمد رسول اللہ کے ساتھ فیصلہ ہوا ہے وہ لوگ کہنے لگے ۔ خدا کی قسم ! ہمارا اسی بات میں تو تم سے اختلاف ہے۔ آپ (صلی اللہ علیہ وآلہ وسلم) نے پوچھا۔ میں کیسے لکھواؤں ؟ انھوں نے کہا : آپ اپنا نسب بیان کر کے تحریر لکھوائیں۔ کہ محمد بن عبداللہ۔ آپ (صلی اللہ علیہ وآلہ وسلم) نے فرمایا : یہ بھی اچھی بات ہے اسی کو لکھ لو۔ تو انھوں نے یہ جملہ لکھ لیا۔
١٠۔ اور ان کی شرائط میں یہ بات بھیتی کہ ہمارے درمیان آپس میں صلح و صفائی رہے گی۔ نہ کوئی خیانت (کرے گا) اور نہ کوئی خفیہ جھوٹ اور تلوار سونتے گا۔
١١۔ اور یہ بھی شر ط تھی کہ ہم میں سے جو تمہارے پاس آئے گا ۔ اسے تم ہمارے پاس واپس بھیجو گے۔ اور جو شخص تم میں سے ہمارے پاس آئے گا ہم اس کو تمہارے پاس واپس نہیں لوٹائیں گے۔ آپ (صلی اللہ علیہ وآلہ وسلم) نے ارشاد فرمایا : جو کوئی میرے ساتھ داخل (ملنا چاہے) ہوگا تو اس کے لیے بھی میری شرط کے موافق شرط ہوگی۔ اس پر قریش نے کہا۔ جو ہمارے ساتھ داخل (ملنا چاہے) ہوگا وہ ہمارا ساتھی شمار ہوگا۔ اور اس کے لیے بھی ہمارے والی شرطیں ہوں گی۔ پھر بنو کعب نے کہا : یا رسول اللہ (صلی اللہ علیہ وآلہ وسلم) ! ہم آپ کے ساتھ ہیں۔ اور بنو بکر نے کہا۔ ہم قریش کے ساتھ ہیں۔
١٢۔ ابھی مسلمان اور اہل مکہ، تحریر لکھ رہے تھے کہ اس دوران حضرت ابو جندل بیڑیوں میں جکڑے ہوئے حاضر ہوئے۔ مسلمانوں نے کہا۔ یہ ابو جندل آگئے۔ رسول اللہ (صلی اللہ علیہ وآلہ وسلم) نے فرمایا : یہ میرے (پاس ہوں گے) ۔ سہیل نے کہا۔ یہ میرے پاس ہوں گے۔ سہیل نے کہا ۔ تحریر پڑھیں۔ تو اس تحریر کی رو سے وہ سہیل کے حق میں چلے گئے۔ حضرت ابو جندل نے عرض کیا۔ یا رسول اللہ (صلی اللہ علیہ وآلہ وسلم) ! اے گروہ مسلمین ! مجھے مشرکین کی طرف واپس کیا جائے گا ؟ حضرت عمر نے فرمایا : اے ابو جندل ! یہ ہے تلوار ! دو بندے ہی تو ہیں۔ سہیل نے کہا۔ اے عمر ! تم نے میرے خلاف معاونت کی ہے۔ رسول اللہ (صلی اللہ علیہ وآلہ وسلم) نے سہیل سے کہا یہ شخص مجھے ہدیہ کردو۔ سُہیل نے کہا : نہیں ! آپ (صلی اللہ علیہ وآلہ وسلم) نے فرمایا : مجھے تم اس کو رکھنے کی اجازت دے دو ۔ سہیل نے کہا نہیں۔ مکرز نے کہا۔ اے محمد ! میں تمہیں اس کے رکھنے کی اجازت دیتا ہوں۔