(٣٨٠١٠) حضرت عروہ بن زبیر سے روایت ہے کہ رسول اللہ (صلی اللہ علیہ وآلہ وسلم) حدیبیہ کے دن اٹھارہ سو کی تعداد کو لے کر نکلے اور آپ (صلی اللہ علیہ وآلہ وسلم) نے اپنے آگے بنو خزاعہ کے ایک شخص ۔۔۔ جس کا نام ناجیہ تھا۔۔۔ کو بھیجا تاکہ وہ لوگوں کی خبر لائے۔ یہاں تک کہ رسول اللہ (صلی اللہ علیہ وآلہ وسلم) مقام عسفان کے کنویں پر پہنچے جس کا نام غدیر اشطاط تھا۔ تو آپ (صلی اللہ علیہ وآلہ وسلم) کو اپنا جاسوس غدیر اشطاط پر ملا اور اس نے کہا : اے محمد ! میں نے تیری قوم ۔۔۔ کعب بن لؤی اور عامر بن لؤی ۔۔۔ کو اس حال میں چھوڑا ہے کہ انھوں نے آپ کے لیے متفرق لوگوں کو اور جو کوئی ان کی مانتا ہے ان کو نفیر عام کیا ہے۔ انھوں نے تیرے چلنے کی خبر سن لی ہے۔ اور میں نے ان کے غلاموں کو اس حال میں چھوڑا ہے کہ انھیں گھروں میں خزیر (خاص کھانا) کھلایا جاتا ہے۔ اور خالد بن ولید کو تو انھوں نے یہ سامنے گھڑ سواروں کی جماعت کے ہمراہ بھیجا ہے۔
٢۔ نبی کریم (صلی اللہ علیہ وآلہ وسلم) کھڑے ہوئے اور آپ (صلی اللہ علیہ وآلہ وسلم) نے (صحابہ سے) پوچھا۔ تم کیا کہتے ہو ؟ تمہارا کیا حکم ہے ؟ مجھے بتاؤ۔ قریش اور ان کی تیاریوں کی خبر تمہیں دو مرتبہ پہنچ چکی ہے۔ اور یہ مقام غمیم میں خالد بن ولید بھی پہنچ چکا ہے۔ نبی کریم (صلی اللہ علیہ وآلہ وسلم) نے صحابہ سے پوچھا۔ کیا تمہاری رائے یہ ہے کہ ہم اپنے رُخ پر چلتے رہیں اور جو کوئی ہمیں بیت اللہ سے روکے ہم اس سے لڑائی کریں۔ یا تمہاری رائے یہ ہے کہ ہم ان کے برخلاف ان کے پچھلوں کی طرف بڑھیں۔ پھر اگر ان میں سے کوئی جماعت پیچھے آئے گی تو اللہ تعالیٰ اس کو توڑ دے گا۔ صحابہ نے عرض کیا۔ یا رسول اللہ (صلی اللہ علیہ وآلہ وسلم) ! حُکم، آپ کا حکم ہے۔ اور رائے بھی آپ کی رائے ہے۔ پھر یہ لوگ اس ٹیلے کے دائیں بائیں چل دیئے۔ اس بات کا خالد اور اس کے ہمراہ لشکر کو پتہ نہیں چلا۔ یہاں تک کہ یہ لوگ لشکر کے غبار کو کر اس کر گئے۔
٣۔ آپ (صلی اللہ علیہ وآلہ وسلم) کی اونٹنی آپ (صلی اللہ علیہ وآلہ وسلم) کو ایک بلند ٹیلے سے ایک پست زمین کی طرف لے گئی۔ جس کا نام بلدح تھا۔ اور (وہاں جا کر) بیٹھ گئی۔ آپ (صلی اللہ علیہ وآلہ وسلم) نے فرمایا : حَلْ حَلْ ۔ لیکن وہ اونٹنی نہیں اٹھی۔ لوگوں نے کہا۔ قصوائ (اونٹنی کا نام ہے) اڑ گئی ہے۔ آپ (صلی اللہ علیہ وآلہ وسلم) نے فرمایا : بخدا یہ اونٹنی نہیں اَڑی اور نہ ہی اڑنا اس کی عادت ہے لیکن اس کو ہاتھیوں کو روکنے والے نے روک دیا ہے۔ سنو ! بخدا اگر آج کے دن وہ مجھے کسی مقام کی طرف ۔۔۔جس کا وہ بہت احترام کرتے ہیں ۔۔۔ بلائیں گے یا مجھے وہ کسی صلہ رحمی کی طرف بلائیں گے تو میں انھیں مثبت جواب دوں گا۔ پھر آپ (صلی اللہ علیہ وآلہ وسلم) نے اونٹنی کو دوڑایا تو وہ اچھل پڑی پس آپ (صلی اللہ علیہ وآلہ وسلم) اپنے قدم کے نشانات پر وہیں واپس ہوگئے جہاں سے تشریف لائے تھے۔ یہاں تک کہ آپ (صلی اللہ علیہ وآلہ وسلم) لوگوں کو لے کر حدیبیہ کے ایک مقام پر فروکش ہوئے جہاں پر پانی اتنا قلیل تھا کہ لوگ تھوڑا تھوڑا پانی لے رہے تھے۔ تو (اس پر) لوگوں نے رسول اللہ (صلی اللہ علیہ وآلہ وسلم) سے پانی کی قلت کی شکایت کی۔ آپ (صلی اللہ علیہ وآلہ وسلم) نے اپنے ترکش میں سے ایک تیر نکالا اور ایک آدمی کو حکم دیا اور اس نے اس تیر کو کنویں کے درمیان میں گاڑ دیا۔ پس پانی نے اتنا جوش مارا کہ لوگ اس پانی سے خوب سیراب ہوگئے۔
٤۔ نبی کریم (صلی اللہ علیہ وآلہ وسلم) ابھی اسی حالت میں تھے کہ بدیل بن ورقاء خزاعی، اپنی قوم خزاعہ کے ایک گروہ کے ہمراہ آپ (صلی اللہ علیہ وآلہ وسلم) کے پاس سے گزرا اور اس نے کہا۔ اے محمد (صلی اللہ علیہ وآلہ وسلم) ! یہ تیری قوم کے لوگ عورتوں اور بچوں سمیت نکل چکے ہیں اور وہ خدا کے نام پر اس بات کی قسم کھا رہے ہیں کہ ضرور بالضرور تیرے اور مکہ کے درمیان حائل ہوں گے یہاں تک کہ ان میں سے کوئی ایک بھی نہ بچے۔ آپ (صلی اللہ علیہ وآلہ وسلم) نے ارشاد فرمایا : اے بدیل ! میں تو کسی کے ساتھ بھی لڑنے نہیں آیا۔ میں تو صرف اس لیے آیا ہوں تاکہ اپنے افعال عبادت ادا کرسکوں اور اس خانہ خدا کا طواف کروں۔ اور اگر یہ کام نہ ہو تو پھر کیا قریش کا کوئی اور ارادہ ہے ؟ کیا وہ اس بات پر راضی ہیں کہ میں ان کے ساتھ ایک مدت طے کرلوں جس میں وہ مامون رہیں گے اور اتنی مدت تک وہ اکٹھے بھی ہوجائیں۔ اور اس دوران وہ مجھے اور لوگوں کو کھلا چھوڑ دیں۔ اگر میرا معاملہ لوگوں پر غالب آگیا تو انھیں اس بات کا اختیار ہوگا ۔ چاہے تو لوگوں کی طرح یہ بھی دین میں داخل ہوجائیں اور چاہے تو یہ لڑائی کرلیں درآنحالیکہ انھوں نے اپنی تعداد بڑھا کر خوب تیاری کرلی ہوگی۔ بدیل نے کہا۔ میں یہ بات آپ (صلی اللہ علیہ وآلہ وسلم) کی قوم کو پیش کروں گا۔
٥۔ پس بدیل سوار ہو کر (چل پڑا) یہاں تک کہ وہ قریش کے پاس سے گزرا تو قریش نے اس سے پوچھا۔ تم کہاں سے آ رہے ہو ؟ بدیل نے کہا۔ میں رسول اللہ (صلی اللہ علیہ وآلہ وسلم) کے پاس سے آ رہا ہوں۔ اور اگر تم چاہو تو میں تمہیں اس بات کی خبر دیتا ہوں جو میں نے آپ (صلی اللہ علیہ وآلہ وسلم) سے سُنی اور کہی ہے۔ قریش مں ت سے بیوقوف قسم کے لوگوں نے کہا۔ تم ہمیں اس کی بات نہ بتاؤ جو تم دیکھ کر اور سن کر آئے ہو۔ بدیل نے انھیں رسول اللہ (صلی اللہ علیہ وآلہ وسلم) کے ساتھ پیش آنے والا واقعہ بیان کیا اور جو آپ (صلی اللہ علیہ وآلہ وسلم) نے مدت کی پیش کش کی تھی وہ بیان کی۔ راوی کہتے ہیں : اس دن قریش (کے اس گروہ) میں عروہ بن مسعود ثقفی بھی موجود تھا۔ وہ اچھل پڑا اور اس نے کہا۔ اے گروہ قریش ! کیا تم مجھ پر کسی شئی کی تہمت لگاتے ہو۔ کیا میں (تمہارا) بچہ نہیں ہوں ؟ اور کیا تم (میرے) والد نہیں ہو ؟ کیا میں نے تمہارے لیے اہل عکاظ سے مدد طلب نہیں کی اور جب انھوں نے مجھے منع کردیا تو مں ش خود اور اپنے بچوں اور ما تحتوں کو لے کر تمہارے پاس نہیں آگیا۔ انھوں نے جواباً کہا : کیوں نہیں ! تو نے ایسا ہی کیا ہے۔ عروہ نے کہا : پھر تم بدیل کی اس بات کو قبول کرلو جو وہ تمہارے پاس لے کر آیا ہے اور جو تمہارے اوپر رسول اللہ (صلی اللہ علیہ وآلہ وسلم) نے پیش کی ہے۔ اور تم مجھے بھیجو تاکہ میں تمہارے پاس اس خیر کی آپ (صلی اللہ علیہ وآلہ وسلم) سے توفیق لے کر آؤں۔ قریش نے (اس سے) کہا۔ چل جا۔
٦۔ عروہ وہاں سے نکلا یہاں تک کہ وہ رسول اللہ (صلی اللہ علیہ وآلہ وسلم) کے پاس مقام حدیبیہ مں اُترا اور اس نے کہا ۔ اے محمد ! یہ تیری قوم۔۔۔ کعب بن لوی اور عامر بن لوی۔۔۔ کے لوگ ہیں جو عورتوں اور بچوں سمیت باہر نکلے ہیں۔ انھوں نے قسم اٹھائی ہے کہ یہ لوگ تجھے مکہ کی طرف راستہ نہیں دیں گے حتی کہ ان کے نوجوان ہلاک ہوجائیں ۔ اور اب آپ کو اپنی قوم سے لڑائی کی دو صورتیں ہیں۔ (ایک تو یہ ہے کہ) تو اپنی قوم کو (لڑائی کر کے) نیست و نابود کر دے اور تو نے کسی آدمی کے بارے میں نہیں سنا ہوگا کہ اس نے تجھ سے پہلے اپنی قوم کو تباہ و برباد کیا ہو۔ اور (دوسری صورت یہ ہے کہ) جن کو میں آپ کے ہمراہ دیکھ رہا ہوں یہ آپ کو حوالہ کردیں ۔ مجھے تو تمہارے ہمراہ اجنبی قسم کے متفرق لوگ نظر آ رہے ہیں۔ مجھے تو ان کے ناموں اور شکلوں سے بھی معرفت نہیں ہے۔
٧۔ حضرت ابوبکر ۔۔۔ کو غصہ آگیا اور ۔۔۔ارشاد فرمایا : تم لات کی فرج چوسو۔ کیا ہم آپ (صلی اللہ علیہ وآلہ وسلم) کو رسوا کریں گے اور آپ (صلی اللہ علیہ وآلہ وسلم) کو حوالہ کریں گے ؟ عروہ نے کہا : بخدا ! اگر تمہارا مجھ پر احسان نہ ہوتا جس کا میں نے بدلہ نہیں دیا۔ تو میں تمہیں تمہاری بات کا ضرور جواب دیتا۔
٨۔ حضرت مغیرہ بن شعبہ ، رسول اللہ (صلی اللہ علیہ وآلہ وسلم) کے پاس کھڑے ہوئے تھے اور ان کے چہرے پر خود تھی۔ (جس کی وجہ سے) عروہ نے ان کو نہ پہچانا۔ اور عروہ رسول اللہ (صلی اللہ علیہ وآلہ وسلم) کے ساتھ باتیں کررہا تھا۔ اور جب بھی عروہ اپنا ہاتھ پھیلاتا تو رسول اللہ (صلی اللہ علیہ وآلہ وسلم) کی داڑھی مبارک کو چھوتا۔ حضرت مغیرہ کے ہاتھ میں جو نیزہ تھا آپ نے اس کے ساتھ عروہ کو خبردار کیا۔ جب مغیرہ نے عروہ کو پریشان کیا تو اس نے پوچھا۔ یہ کون ہے ؟ لوگوں نے بتایا ۔ کہ یہ مغیرہ بن شعبہ ہیں۔ عروہ نے کہا۔ اے عہد شکن ! تم یہاں ہو۔ تم نے کل مقام عکاظ میں اپنی عہد شکنی کو خود سے کیوں نہ دھو ڈالا ؟ نبی کریم (صلی اللہ علیہ وآلہ وسلم) نے عروہ بن مسعود کو وہی بات کہی جو آپ (صلی اللہ علیہ وآلہ وسلم) نے بدیل سے کہی تھی۔
٩۔ عروہ وہاں سے کھڑا ہوا اور چل دیا یہاں تک کہ وہ اپنی قوم میں آیا اور اس نے کہا۔ اے گروہ قریش ! میں شاہوں کے دربار میں بھی گیا ہوں۔ میں قیصر کے پاس اس کے ملک شام میں گیا ہوں اور نجاشی کے پاس ارض حبشہ میں گیا ہوں اور عراق میں کسریٰ کے پاس بھی گیا ہوں۔ (لیکن) بخدا میں کسی بادشاہ کو اپنے لوگوں میں اس قدر عظمت والا نہیں دیکھا جس قدر میں محمد کو اس کے صحابہ میں باعظمت دیکھا ہے۔ بخدا وہ محمد کی طرف نظر گاڑھ کر نہیں دیکھتے اور اس کے پاس آواز اونچی نہیں کرتے۔ اور محمد جس پانی سے وضو کرتا ہے تو اس کے ساتھی اس دھو ون پر جمع ہوجاتے ہیں کہ کس کو اس میں سے کتنا حصہ ملتا ہے ؟ پس بدیل جو خبر تمہارے پاس لایا ہے اس کو قبول کرلو کیونکہ یہ سمجھ داری والا معاملہ ہے۔
١٠۔ قریش نے کہا : تم بیٹھ جاؤ۔ اور قریش نے بنی حارث بن عبد مناف کے ایک آدمی کو بلایا جس کا نام ” حُلَیس “ تھا اور (اس کو) کہا۔ تم جاؤ اور جو تمہیں اس آدمی (نبی (صلی اللہ علیہ وآلہ وسلم) ) کی طرف سے نظر آئے اور معلوم ہو اس کو دیکھو۔
١١۔ حُلیس وہاں سے نکلا۔ پس جب رسول اللہ (صلی اللہ علیہ وآلہ وسلم) نے اس کو آتے ہوئے دیکھا تو آپ (صلی اللہ علیہ وآلہ وسلم) نے اس کو پہچان لیا اور ارشاد فرمایا : یہ ” حُلیس ہے۔ اور یہ ان لوگوں میں سے ہے جو ہدی کی تعظیم کرتے ہیں۔ پس تم اس کے رُخ پر ہدی کو چلا دو ۔ “ صحابہ نے اس کے رُخ پر ہدی کو چلا دیا۔ ابن شہاب کہتے ہیں۔ حُلیس کے بارے میں احادیث (میں بیان) مختلف نقل ہوا ہے۔ بعض راویوں نے بیان کیا ہے کہ وہ آپ (صلی اللہ علیہ وآلہ وسلم) کی خدمت میں حاضر ہوا تھا اور آپ (صلی اللہ علیہ وآلہ وسلم) نے اس کو وہی بات ارشاد فرمائی جو آپ (صلی اللہ علیہ وآلہ وسلم) نے بدیل اور عروہ سے کہی تھی۔ اور بعض راوی بیان کرتے ہیں کہ جب اس نے ہدی (کے جانور کو) دیکھا تو وہ قریش کی طرف واپس چل دیا اور اس نے (قریش سے) کہا۔ یقیناً میں ایسی بات دیکھی ہے کہ اگر تم ان کو روکو گے تو مجھے خوف ہے کہ تم غلطی کا ارتکاب کرو گے۔ پس (اب) تم اپنا معاملہ خود ہی دیکھ لو۔
١٢۔ قریش نے (اس سے بھی) کہا۔ تم بیٹھ جاؤ اور قریش کے ایک آدمی کو بلایا۔ جس کا نام ” مکرز بن حفص بن الاخیف “ تھا۔ یہ شخص بنو عامر بن لؤی سے تعلق رکھتا تھا۔ اور اس کو بھیجا۔ پس جب اس کو نبی کریم (صلی اللہ علیہ وآلہ وسلم) نے دیکھا تو آپ (صلی اللہ علیہ وآلہ وسلم) نے ارشاد فرمایا۔ یہ ایک فاجر آدمی ہے جو آنکھ سے دیکھتا ہے۔ اور آپ (صلی اللہ علیہ وآلہ وسلم) نے اس کو بھی مدت کے بارے میں ویسی بات کہی جیسی آپ (صلی اللہ علیہ وآلہ وسلم) نے بدیل اور اس کے دیگر ساتھیوں سے کہی تیے۔ مکرز وہاں سے مشرکین کے پاس واپس آیا اور اس نے (آ کر) انھیں خبر دی۔
١٣۔ اس پر قریش نے بنو عامر بن لؤی کے سہیل بن عمرو کو بھیجا تاکہ وہ آپ (صلی اللہ علیہ وآلہ وسلم) سے وہ بات تحریر کروائے جس کی طرف آپ (صلی اللہ علیہ وآلہ وسلم) دعوت دے رہے ہیں۔ سہیل بن عمرو آپ (صلی اللہ علیہ وآلہ وسلم) کے پاس آیا اور کہا۔ مجھے قریش نے آپ کی طرف اس لیے بھیجا ہے تاکہ میں آپ سے ایسا فیصلہ تحریر کرواؤں جس پر میں اور آپ راضی ہوں۔ نبی کریم (صلی اللہ علیہ وآلہ وسلم) نے ارشاد فرمایا : ہاں (ٹھیک ہے) ، لکھو، بسم اللّٰہ الرحمن الرحیم۔ راوی کہتے ہیں : سہیل بن عمرو کہنے لگا۔ میں تو اللہ کو نہیں جانتا اور نہ ہی مجھے رحمن کی معرفت ہے۔ لیکن میں تو ایسے ہی لکھوں گا جیسا کہ ہم لکھتے ہیں۔ یعنی۔ باسمک اللّٰہم۔ لوگوں کو اس بات پر غصہ آگیا اور کہنے لگے۔ ہم تمہارے ساتھ کسی بھی طرح کی مکاتبت نہیں کریں گے یہاں تک کہ تو رحمٰن و رحیم کا اقرا ر کرے۔ سہیل نے کہا : پھر تو میں تمہارے ساتھ کسی طرح کی مکاتبت نہیں کروں گا اور لوٹ جاؤں گا۔ رسول اللہ (صلی اللہ علیہ وآلہ وسلم) نے ارشاد فرمایا : لکھو۔ باسمک اللّٰھم۔ یہ وہ تحریر ہے جس پر ” محمد رسول اللہ “ نے باہم صلح کی ہے۔ سہیل نے کہا۔ میں اس بات کا اقرار نہیں کرتا۔ اگر میں آپ کو اللہ کا رسول جانتا ہوتا تو میں آپ کی مخالفت نہ کرتا اور نہ ہی آپ کی نافرمانی کرتا۔ لیکن میں تو ” محمد بن عبداللہ “ لکھوں گا۔ اس بات پر بھی لوگوں کو غصہ آیا۔ آپ (صلی اللہ علیہ وآلہ وسلم) نے ارشاد فرمایا : تم لکھو۔ (محمد بن عبداللہ ، سہیل بن عمرو)
١٤۔ اس پر حضرت عمر بن خطاب کھڑے ہوگئے اور عرض کیا۔ یا رسول اللہ (صلی اللہ علیہ وآلہ وسلم) ! کیا ہم حق پر نہیں ہیں ؟ اور کیا ہمارا دشمن باطل پر نہیں ہے۔ آپ (صلی اللہ علیہ وآلہ وسلم) نے فرمایا۔ کیوں نہیں (ایسا ہی ہے) ۔ حضرت عمر نے عرض کیا۔ پھر ہم کس بنیاد پر اپنے دین میں یہ گھٹیا پن گوارا کر رہے ہیں ؟ آپ (صلی اللہ علیہ وآلہ وسلم) نے ارشاد فرمایا : میں خدا کا رسول ہوں۔ اور میں ہرگز اس کی نافرمانی نہیں کروں گا۔ اور وہ ہرگز مجھے ضائع نہیں ہونے دے گا۔ حضرت ابوبکر ایک کونے میں گوشہ نشین تھے۔ کہ حضرت عمر ان کے پاس پہنچے اور کہا۔ اے ابوبکر ! انھوں نے فرمایا : جی ہاں ! حضرت عمر نے کہا : کیا ہم حق پر نہیں ہیں ؟ اور کیا ہمارا دشمن باطل پر نہیں ہیں ؟ حضرت ابوبکر نے فرمایا : کیوں نہیں (ایسا ہی ہے) حضرت عمر نے کہا۔ تو پھر کس وجہ سے ہم اپنے دین میں یہ گھٹیا پن گوارا کر رہے ہیں۔ حضرت ابوبکر نے فرمایا : اے عمر ! اپنا یہ خیال چھوڑ دو ۔ اس لیے کہ آپ (صلی اللہ علیہ وآلہ وسلم) اللہ کے رسول ہیں ؟ اللہ پاک، آپ (صلی اللہ علیہ وآلہ وسلم) کو ہرگز ضائع نہیں ہونے دیں گے اور آپ (صلی اللہ علیہ وآلہ وسلم) اللہ تعالیٰ کی ہرگز نافرمانی نہیں کریں گے۔
١٥۔ اور اس خط کی شرائط میں ایک بات یہ بھی تھی کہ ہم میں سے جو تمہارے پاس آ جائے۔۔۔ اگرچہ وہ تمہارے دین پر ہو ۔۔۔ تم اس کو ہماری طرف واپس کرو گے۔ اور تمہارے پاس سے جو ہمارے ہاں آئے گا ہم اس کو تمہاری طرف واپس ۔۔۔ نہیں کریں گے۔ آپ (صلی اللہ علیہ وآلہ وسلم) نے فرمایا : جو شخص میری جانب سے (تمہاری طرف) آئے گا مجھے اس کی واپسی کی ضرورت نہیں ہے۔ اور جو تو نے اپنے لیے شرائط ٹھہرائی ہے یہ میرے اور تیرے درمیان (عہد) ہے۔
١٦۔ لوگ ابھی اسی حالت میں تھے کہ اچانک مسلمانوں کو ابو جندل بن سہیل بن عمرو بیڑیوں میں گھسٹتا ہوا دکھائی دیا۔ پس سہیل نے اپنا سر اوپر اٹھایا تو ناگہاں اس کا اپنا بیٹا ابو جندل تھا۔ سہیل نے کہا : یہ پہلا شخص ہے جس کی واپسی پر میں نے تیرے ساتھ صلح کی ہے۔ آپ (صلی اللہ علیہ وآلہ وسلم) نے ارشاد فرمایا : اے سہیل ! ہم تو ابھی تحریر سے فارغ ہی نہیں ہوئے ۔ سہیل نے کہا۔ جب تک آپ اس کو واپس نہیں کرتے ہیں آپ سے خط و کتابت ہی نہیں کرتا۔ آپ (صلی اللہ علیہ وآلہ وسلم) نے ارشاد فرمایا : اس کا معاملہ تیرے حوالہ ہے۔ راوی کہتے ہیں۔ ابو جندل ، مسلمانوں کی طرف تیز چل کر آیا اور اس نے کہا۔ اے جماعتِ مسلمین ! مجھے مشرکین کی طرف واپس کیا جا رہا ہے جبکہ وہ مجھے میرے دین کے بارے میں فتنہ میں مبتلا کریں گے ؟ حضرت عمر اس کے ساتھ چپک گئے اور اس کے والد نے اس کا ہاتھ پکڑا اور اس کو کھینچ لیا۔ حضرت عمر کہنے لگے۔ ایک ہی تو بندہ ہے اور تمہارے پاس تلوار بھی ہے۔ لیکن ان کا والد انھیں ساتھ لے گیا۔
١٧۔ پس نبی کریم (صلی اللہ علیہ وآلہ وسلم) ان لوگوں کو مشرکین کی طرف واپس بھیجتے تھے جو مشرکین کی طرف سے دین اسلام قبول کر کے آتے تھے۔ پس جب یہ واپس ہونے والے افراد ایک جماعت کی شکل اختیار کر گئے اور انہی میں ابو البصیر بھی تھے۔۔۔ درآنحالیکہ آپ (صلی اللہ علیہ وآلہ وسلم) ان کو واپس بھیجتے رہے تھے۔ تو یہ لوگ سمندر کے ساحل پر ٹھہر گئے اور انھوں نے قریش کے شام کی طرف جانے والے قافلوں کو لوٹنا شروع کردیا۔ اس پر قریش نے نبی کریم (صلی اللہ علیہ وآلہ وسلم) کی طرف (آدمی) بھیجا کہ ہمیں تم سے صلہ رحمی کی امید ہے۔ آپ ان (مفرور) لوگوں کو اپنے پاس واپس بلا لیں اور اپنے پاس اکٹھا کرلیں۔ پس آپ (صلی اللہ علیہ وآلہ وسلم) نے انھیں اپنی طرف واپس بلا لیا۔
١٨۔ اور تحریر میں آپ (صلی اللہ علیہ وآلہ وسلم) نے ان کے سامنے جو ارادہ ظاہر کیا تھا اس میں یہ بات بھی تھی کہ قریش کے لوگ آپ (صلی اللہ علیہ وآلہ وسلم) کو چھوڑیں تاکہ آپ (صلی اللہ علیہ وآلہ وسلم) مکہ میں داخل ہوں اور اپنے مناسک کو ادا کریں اور ان کے ہاں اپنے ہدی کے جانور نحر کریں۔ قریش نے کہا۔ نہیں ! عرب کے لوگ ہمیں ہمیشہ کے لیے کہیں یہ طعنہ نہ دیں کہ آپ نے ہمارے ساتھ چستی کا مظاہرہ کر دکھایا ہے۔ لیکن آپ اس سال واپس جائیں اور جب آئندہ سال ہوگا تو ہم آپ کو اجازت دیں گے آپ عمرہ بھی ادا فرمائیں اور تین دن قیام بھی فرمائیں۔
١٩۔ رسول اللہ (صلی اللہ علیہ وآلہ وسلم) (وہاں سے) کھڑے ہوئے اور لوگوں سے ارشاد فرمایا : ” اٹھو اور اپنے ہدی کے جانور نحر کردو۔ اور حلق کروا لو اور حلال ہو جاؤ۔ “ (یہ بات سن کر) کوئی آدمی کھڑا ہوا اور نہ ہی کسی نے کوئی حرکت کی۔ رسول اللہ (صلی اللہ علیہ وآلہ وسلم) نے لوگوں کو اس بات کا تین مرتبہ حکم ارشاد فرمایا :َ لیکن کوئی آدمی بھی اپنی جگہ سے اٹھا اور نہ ہی کسی نے کوئی حرکت کی۔ جب نبی کریم (صلی اللہ علیہ وآلہ وسلم) نے یہ صورت حال دیکھی تو آپ (صلی اللہ علیہ وآلہ وسلم) حضرت ام سلمہ کے پاس تشریف لے گئے ۔۔۔ حضرت ام سلمہ اس سفر میں آپ (صلی اللہ علیہ وآلہ وسلم) کے ہمراہ تشریف لائی تھیں۔ اور فرمایا : ” اے ام سلمہ ! لوگوں کو کیا ہوگیا ہے کہ میں نے ان کو تین مرتبہ اس بات کا حکم دیا ہے کہ وہ نحر کرلیں اور حلق کروا لیں اور حلال ہوجائیں۔ لیکن کوئی آدمی بھی میرے حکم کو پورا کرنے کے لیے نہیں اٹھا ؟ “ حضرت ام سلمہ نے عرض کیا۔ یا رسول اللہ (صلی اللہ علیہ وآلہ وسلم) ! آپ باہر تشریف لے جائیں اور یہ کام (پہلے خود) کریں۔ پس رسول اللہ (صلی اللہ علیہ وآلہ وسلم) (وہاں سے) اٹھے اور آپ (صلی اللہ علیہ وآلہ وسلم) نے اپنے ہدی کے جانور کی طرف قصد کیا اور اس کو نحر فرمایا۔ اور آپ (صلی اللہ علیہ وآلہ وسلم) نے حلق کرنے والے کو بلایا اور اس نے آپ (صلی اللہ علیہ وآلہ وسلم) (کے سر مبارک) کو حلق کیا۔ پس جب لوگوں نے رسول اللہ (صلی اللہ علیہ وآلہ وسلم) کے اس عمل کو دیکھا تو اپنی اپنی ہدی کی طرف لپک پڑے اور اس کو نحر کردیا۔ اور بعض ، بعض کے اوپر جھک گئے اور حلق کرنے لگے۔ یہاں تک کہ قریب تھا کہ بعض ، بعض کو بھیڑ کی وجہ سے نیچے دے دیتے۔
٢٠۔ ابن شہاب کہتے ہیں۔ ہدی کے وہ جانور جو رسول اللہ (صلی اللہ علیہ وآلہ وسلم) اور آپ (صلی اللہ علیہ وآلہ وسلم) کے صحابہ نے ساتھ لیے تھے ۔ وہ ستر تھے۔
٢١۔ ابن شہاب کہتے ہیں۔ رسول اللہ (صلی اللہ علیہ وآلہ وسلم) نے خیبر کو اہل حدیبیہ پر اٹھارہ حصوں میں تقسیم کیا تھا۔ ہر ایک سو افراد کے لیے ایک حصہ تھا۔