(٣٨١٦٢) حضرت عبد الرحمن بن عبداللہ بن کعب بن مالک، اپنے والد حضرت کعب بن مالک سے روایت کرتے ہیں کہ رسول اللہ (صلی اللہ علیہ وآلہ وسلم) نے جب بنو الاصفر کا ارادہ فرمایا کہ آپ (صلی اللہ علیہ وآلہ وسلم) ان کے ساتھ لڑائی کریں تو آپ (صلی اللہ علیہ وآلہ وسلم) نے لوگوں کے سامنے ان کے معاملہ کو کھول کر بیان فرمایا۔۔۔ آپ (صلی اللہ علیہ وآلہ وسلم) کی عادت یہ تھی کہ جب بھی کسی غزوہ کا ارادہ کرتے تو کسی دوسرے سفر سے توریہ فرما لیتے ۔۔۔ تاآنکہ یہ غزوہ پیش آیا۔ اس میں آپ (صلی اللہ علیہ وآلہ وسلم) کو شدید گرمی، دور کے سفر اور نئے دشمن سے سابقہ پیش آیا چنانچہ آپ (صلی اللہ علیہ وآلہ وسلم) نے لوگوں کو وہ مقصد کھول کر بیان کردیا جس میں آپ (صلی اللہ علیہ وآلہ وسلم) انھیں لے کر جا رہے تھے تاکہ مسلمان، دشمن کے شایانِ شان تیاری کرلیں۔
٢۔ پھر رسول اللہ (صلی اللہ علیہ وآلہ وسلم) نے تیاری فرمائی اور لوگوں نے بھی آپ (صلی اللہ علیہ وآلہ وسلم) کے ہمراہ تیاری کرلی۔ میں نے صبح کے وقت تیاری کرنا چاہی لیکن میں تیاری نہ کرسکا یہاں تک کہ لوگ (تیار ہو کر) فارغ ہوگئے اور کہا جانے لگا کہ رسول اللہ (صلی اللہ علیہ وآلہ وسلم) صبح ہوتے ہی اپنے سفر پر روانہ ہوجائیں گے۔ میں نے (دل میں) کہا۔ میں آپ (صلی اللہ علیہ وآلہ وسلم) کے بعد ایک دو دن میں تیاری کرلوں گا اور پھر آپ (صلی اللہ علیہ وآلہ وسلم) کو پالوں گا۔ میرے پاس دو سواریاں تھیں۔ جبکہ میرے پاس اس سے پہلے کبھی دو سواریاں اکٹھی نہیں ہوئی تھیں۔ پس میں اپنی ذات کے اعتبار سے بھی قادر تھا اور اپنے زاد راہ کے حوالہ سے بھی قوی تھا۔ آپ (صلی اللہ علیہ وآلہ وسلم) کے بعد مسلسل دن گزرتے رہے اور میں کچھ بھی نہ کرسکا یہاں تک کہ لشکر کے لوگ تیزی سے سفر کرنے لگے۔
پھر مجھ پر ایک دن ایسا آیا کہ میں نے (پیچھے رہنے والوں میں) صرف ایسے آدمی کو دیکھا جس کو اللہ تعالیٰ نے معذور قرار دے رکھا تھا۔ یا ایسے آدمی کو دیکھا جس کے بارے میں نفاق کا چرچا تھا۔ اس بات نے مجھے بہت غم گین کردیا۔
٣۔ اب میں نے رسول اللہ (صلی اللہ علیہ وآلہ وسلم) کے واپس آجانے کے وقت کے لیے عذر تیار کرنا شروع کیا اور باتیں بنانے کی کوشش شروع کی۔ اور رسول اللہ (صلی اللہ علیہ وآلہ وسلم) کو ایسی تقدیر پیش آئی کہ آپ (صلی اللہ علیہ وآلہ وسلم) کو تبوک کے مقام پر پہنچنے تک میری یاد ہی نہیں آئی۔ آپ (صلی اللہ علیہ وآلہ وسلم) مقام تبوک میں لوگوں کے درمیان بیٹھے ہوئے پوچھا۔ کعب بن مالک نے کیا کیا ؟ “ میری قوم کے آدمی نے کھڑے ہو کر عرض کیا۔ اسے کچھ چیزوں نے مصروف رکھا۔ راوی کہتے ہیں۔ ایک دوسرا آدمی بولا اور اس نے کہا۔ خدا کی قسم ! یا رسول اللہ (صلی اللہ علیہ وآلہ وسلم) ! ہم تو اچھی بات ہی کو جانتے ہیں۔ اس پر رسول اللہ (صلی اللہ علیہ وآلہ وسلم) خاموش ہوگئے۔
٤۔ پھر جب کہا گیا کہ رسول اللہ (صلی اللہ علیہ وآلہ وسلم) واپس پہنچنے والے ہیں۔ تو مجھ سے ہر باطل اور جو کچھ میں نے جھوٹ، عذر گھڑے تھے وہ سب دور ہوگئے۔ مجھے معلوم ہوگیا کہ مجھے اس حالت میں صرف سچ ہی نجات دے سکتا ہے۔ چنانچہ میں نے سچ کو اکٹھا کیا۔ (جب) رسول اللہ (صلی اللہ علیہ وآلہ وسلم) نے صبح کی تو آپ (صلی اللہ علیہ وآلہ وسلم) (مدینہ میں) تشریف لائے ۔ میں آپ (صلی اللہ علیہ وآلہ وسلم) کی خدمت میں حاضر ہوا اور آپ (صلی اللہ علیہ وآلہ وسلم) لوگوں کے درمیان تشریف فرما تھے اور مسجد میں تھے۔ آپ (صلی اللہ علیہ وآلہ وسلم) کی عادت یہ تھی کہ جب آپ (صلی اللہ علیہ وآلہ وسلم) سفر سے واپسی فرماتے تو مسجد میں آتے اور وہاں دو رکعات ادا کرتے پھر آپ (صلی اللہ علیہ وآلہ وسلم) اپنے اہل خانہ کے پاس تشریف لے جاتے۔ چنانچہ میں نے آپ (صلی اللہ علیہ وآلہ وسلم) کو مسجد میں بیٹھا ہوا پایا۔ جب آپ (صلی اللہ علیہ وآلہ وسلم) نے میری طرف دیکھا تو مجھے بلایا اور فرمایا۔ اے کعب ! ادھر آؤ تمہیں کس چیز نے میرے ساتھ سے پیچھے رکھا ؟ آپ (صلی اللہ علیہ وآلہ وسلم) غصہ والے آدمی کی طرح مسکرائے۔ کعب کہتے ہیں : میں نے عرض کیا۔ یا رسول اللہ (صلی اللہ علیہ وآلہ وسلم) ! میرے پاس کوئی عذر نہیں ہے۔ میں آپ کے ساتھ سے پیچھے رہنے کے وقت جس قدر وسعت اور قدرت میں تھا اتنا میں کبھی نہیں ہوا ۔ (اس وقت) آپ (صلی اللہ علیہ وآلہ وسلم) کے پاس پیچھے رہ جانے والے لوگ آ کر قسمیں کھا رہے تھے اور آپ (صلی اللہ علیہ وآلہ وسلم) ان کی قسموں کا اعتبار کر کے ان کے لیے مغفرت طلب کر رہے تھے۔ اور ان کے خفیہ ارادوں کو اللہ کی طرف سپرد فرما رہے تھے۔ پس جب مں و نے آپ (صلی اللہ علیہ وآلہ وسلم) سے سچ بات کہہ ڈالی تو آپ (صلی اللہ علیہ وآلہ وسلم) نے ارشاد فرمایا : ” رہا یہ آدمی ! تو اس نے سچ بولا ہے۔ پس تم کھڑے ہو جاؤ یہاں تک کہ اللہ تعالیٰ نے تمہارے بارے میں جو فیصلہ کرنا ہے وہ کر دے۔ “ چنانچہ میں (وہاں سے) اٹھ کھڑا ہوا۔
٥۔ بنو سلمہ کے کچھ لوگ میری جانب اٹھے اور کہنے لگے۔ خدا کی قسم ! تم نے کوئی (کام کی) بات نہیں کی۔ خدا کی قسم ! تمہارے کردہ گناہ کے لیے تو رسول اللہ (صلی اللہ علیہ وآلہ وسلم) کا استغفار ہی کافی ہوجاتا۔ جیسا کہ آپ (صلی اللہ علیہ وآلہ وسلم) نے تیرے علاوہ دیگر لوگوں کے لیے استغفار کیا ہے۔ کہ آپ (صلی اللہ علیہ وآلہ وسلم) نے ان کی طرف سے عذر قبول فرما لیا اور ان کے لیے مغفرت طلب کی۔ پس بنو سلمہ کے لوگ مجھے مسلسل ملامت کرتے رہے یہاں تک کہ میں نے ارادہ کیا کہ میں (آپ (صلی اللہ علیہ وآلہ وسلم) کے پاس) واپس جاتا ہوں اور اپنی تکذیب کرتا ہوں۔ پھر میں نے ان لوگوں سے پوچھا۔ کیا یہ بات کسی اور نے بھی کہی ہے یا جو عذر میں نے بیان کیا ہے ایسا کسی اور نے بھی کیا ہے ؟ انھوں نے جواب دیا : ہاں ! میں نے پوچھا : کس نے ؟ انھوں نے کہا : ہلال بن امیہ واقفی اور ربیعہ بن مرارہ عمری نے۔ اور لوگوں نے مجھے ان دو نیک آدمیوں کا بتایا جو کہ غزوہ بدر میں بھی شریک ہوئے تھے۔ کہ انھوں نے بھی تیری طرح کا عذر بیان کیا ہے۔ اور ان کو بھی وہی بات کہی گئی ہے جو تمہیں کہی گئی ہے۔
راوی کہتے ہیں : رسول اللہ (صلی اللہ علیہ وآلہ وسلم) نے (لوگوں کو) ہمارے ساتھ بات کرنے سے منع کردیا ۔ چنانچہ ہم صبح کے وقت لوگوں میں گئے تو ہم سے کوئی شخص بات نہیں کرتا تھا۔ اور نہ ہی کوئی ہمیں سلام کرتا تھا۔ اور نہ ہمارے سلام کا جواب دیتا تھا۔ یہاں تک کہ جب چالیس راتیں پوری ہوگئیں تو ہمیں رسول اللہ (صلی اللہ علیہ وآلہ وسلم) (کا پیغام) آیا کہ تم اپنی بیویوں سے جدا ہو جاؤ۔ چنانچہ حضرت ہلال بن امیہ کی جو بیوی تھی وہ آپ (صلی اللہ علیہ وآلہ وسلم) کی خدمت میں حاضر ہوئی اور آپ (صلی اللہ علیہ وآلہ وسلم) سے عرض کیا۔ ہلال بن امیہ ایک بوڑھے آدمی ہیں اور ان کی نگاہ بھی کمزور ہے، کیا آپ اس بات کو بھی ناپسند کرتے ہیں کہ میں انھیں کھانا بنادیا کروں ؟ آپ (صلی اللہ علیہ وآلہ وسلم) نے جواب میں فرمایا : نہیں (اس کو تو ناپسند نہیں کرتا) لیکن وہ تمہارے قریب نہ آئے۔ ہلال کی بیوی کہنے لگیں۔ بخدا ! ان کو تو ایسی کسی چیز کی خواہش ہی نہیں ہے۔ خدا کی قسم ! جب سے ان کا یہ معاملہ ہوا ہے وہ تو اس دن سے آج تک مسلسل رو رہے ہیں۔
٧۔ حضرت کعب کہتے ہیں۔ میرے بعض گھر والوں نے مجھ سے کہا۔ تم بھی رسول اللہ (صلی اللہ علیہ وآلہ وسلم) سے اپنی بیوی کے بارے میں اجازت طلب کرلو جیسا کہ ہلال بن امیہ کی بیوی نے اجازت طلب کرلی ہے اور آپ (صلی اللہ علیہ وآلہ وسلم) نے اس کو اجازت دے دی ہے۔ کہ وہ ہلال کی خدمت کریں۔ کعب کہتے ہیں۔ میں نے کہا۔ خدا کی قسم ! میں تو آپ (صلی اللہ علیہ وآلہ وسلم) سے (اس بات کی) اجازت نہیں مانگوں گا ۔ اور اگر میں آپ (صلی اللہ علیہ وآلہ وسلم) سے (اس بات کی) اجازت مانگوں تو مجھے خبر نہیں ہے کہ آپ (صلی اللہ علیہ وآلہ وسلم) مجھے کیا جواب دیں گے۔ کیونکہ وہ تو بوڑھے ہیں اور میں ایک جوان آدمی ہوں ۔ چنانچہ میں نے اپنی بیوی سے کہا۔ اپنے گھر والوں کے پاس چلی جاؤ یہاں تک کہ اللہ تعالیٰ نے جس چیز کا فیصلہ کرنا ہو وہ کردیں۔ اور ہم لوگوں کے درمیان اس حالت میں چلتے تھے کہ کوئی ہم سے کلام نہیں کرتا تھا اور نہ ہی ہمارے سلام کا جواب ہمیں دیتا تھا۔
٨۔ حضرت کعب کہتے ہیں : پس میں چلا یہاں تک کہ میں اپنے چچا زاد کے باغ کی دیوار کو پھلاند گیا اور میں نے سلام کیا لیکن انھوں نے سلام کے جواب میں اپنے ہونٹوں کو بھی حرکت نہ دی۔ میں نے (ان سے) کہا۔ میں تمہیں خدا کی قسم دیتا ہوں۔ کیا تم جانتے ہو کہ میں اللہ اور اس کے رسول (صلی اللہ علیہ وآلہ وسلم) سے محبت کرتا ہوں۔ لیکن انھوں نے مجھ سے کوئی بات بھی نہ کی۔ میں نے پھر دوبارہ یہ بات دہرائی لیکن انھوں نے میرے ساتھ بات نہیں کی۔ یہاں تک کہ جب تیسری یا چوتھی بار یہ بات میں نے کہی تو انھوں نے جواب میں کہا۔ اللہ اور اس کے رسول (صلی اللہ علیہ وآلہ وسلم) زیادہ جانتے ہیں۔
٩۔ پس میں (وہاں سے) نکلا اور میں بازار میں چلنے لگا تو لوگ میری طرف ہاتھ سے اشارہ کرنے لگے ۔ اور ایک شامی عیسائی عالم میرے بارے میں (لوگوں سے) سوال کررہا تھا۔ چنانچہ لوگوں نے میری طرف اشارہ کیا یہاں تک کہ وہ میرے پاس آیا اور اس نے مجھے شام میں رہنے والے میری قوم میں سے کسی کا خط دیا کہ : ہمیں وہ بات پہنچی ہے جو تیرے ساتھ تیرے ساتھی نے کی ہے۔ اور تم سے اس کی بےرخی کرنا بھی ہمیں پہنچا ہے۔ پس تم ہمارے پاس آجاؤ۔ کیونکہ اللہ نے تمہیں ذلت کی جگہ اور ضائع ہونے کی جگہ نہیں بنایا۔ ہم تمہارے ساتھ اپنے اموال میں ہمدردی کریں گے۔ حضرت کعب کہتے ہیں۔ میں نے کہا۔ اِنَّا للّٰہ۔ اہل کفر بھی مجھ میں طمع کرنے لگے ہیں۔ چنانچہ میں وہ خط لے کر تنور کی طرف گیا اور میں نے اس خط کو تنور میں پھینک دیا۔
١٠۔ خدا کی قسم ! میں اپنی اسی حالت میں تھا جس کا ذکر اللہ تعالیٰ نے فرمایا ہے۔ تحقیق زمین باوجود اپنی وسعت کے ہم پر تنگ ہوگئی اور ہمارے اپنے دل ہم پر تنگ ہوگئے۔ جس دن (لوگوں کو) ہم سے گفتگو کرنے سے منع کیا گیا تھا اس کے بعد سے پچاسویں صبح تھی کہ رسول اللہ (صلی اللہ علیہ وآلہ وسلم) پر توبہ (کی قبولیت کی خبر) نازل ہوئی چنانچہ رسول اللہ (صلی اللہ علیہ وآلہ وسلم) نے جب فجر کی نماز پڑھائی تو آپ (صلی اللہ علیہ وآلہ وسلم) نے اللہ تعالیٰ کی طرف سے ہماری توبہ کی قبولیت کا اعلان فرمایا۔ اس پر لوگ ہمیں بشارتیں دینے لگے۔ اور ایک آدمی نے میری طرف گھوڑا دوڑایا اور بنو اسلم میں سے ایک آدمی دوڑ کر آیا اور وہ پہاڑ پر کھڑا ہوا اور آواز دی اور آواز گھوڑے سے بھی زیادہ تیز رفتار تھی۔ پس اس نے آواز دی۔ اے کعب بن مالک ! تمہیں خوشخبری ہو ! میں (یہ سن کر) سجدہ میں گرگیا اور مجھے پتہ چل گیا کہ پریشانی دور ہوگئی ہے۔ پھر جب وہ آدمی میرے پاس آیا جس کی آواز میں نے سُنی تھی تو میں نے اس کو خوشخبری سنانے کے عوض دونوں کپڑے اتار کر دے دیئے۔ اور خدا کی قسم ! میں اس دن ان دونوں کپڑوں کے علاوہ کسی شئی کا مالک نہیں تھا۔
١١۔ میں نے دو کپڑے مستعار لیے اور میں رسول اللہ (صلی اللہ علیہ وآلہ وسلم) کی طرف چل نکلا ۔ مجھے لوگ فوج در فوج ملے اور مجھے اللہ تعالیٰ کی طرف سے توبہ کی قبولیت پر مبارک بار دیتے تھے۔ یہاں تک کہ میں مسجد میں داخل ہوا تو حضرت طلحہ بن عبید اللہ میری طرف دوڑتے ہوئے آئے اور انھوں نے مجھ سے مصافحہ کیا اور مجھے مبارک باد دی۔ مہاجرین میں سے کوئی آدمی ان کے سوا میری طرف کھڑا نہیں ہوا۔ اسی لیے حضرت کعب ، حضرت طلحہ کو نہیں بھولتے تھے۔ پھر میں آگے بڑھا یہاں تک کہ میں رسول اللہ (صلی اللہ علیہ وآلہ وسلم) کے پاس جا کھڑا ہوا گویا کہ آپ (صلی اللہ علیہ وآلہ وسلم) کا چہرہ مبارک چاند کا ٹکڑا تھا ۔۔۔ اور جب آپ (صلی اللہ علیہ وآلہ وسلم) کو خوشی ہوتی تو آپ (صلی اللہ علیہ وآلہ وسلم) کا چہرہ مبارک اسی طرح روشن ہوجاتا تھا ۔۔۔ آپ (صلی اللہ علیہ وآلہ وسلم) نے مجھے آواز دی ” اے کعب ! ادھرآؤ۔ جب سے تمہاری ماں نے تمہیں جنا ہے۔ اس وقت سے اب تک کے دنوں میں سے بہترین دن کی تمہیں بشارت ہو “ حضرت کعب کہتے ہیں : میں نے عرض کیا۔ آپ کی طرف سے یا اللہ کی طرف سے ؟ آپ (صلی اللہ علیہ وآلہ وسلم) نے فرمایا : ” نہیں بلکہ اللہ کی طرف سے۔ بیشک تم نے اللہ کے ساتھ سچ بولا چنانچہ اللہ نے تمہاری تصدیق کی۔
١٢۔ حضرت کعب فرماتے ہیں : میں نے عرض کیا۔ آج میری توبہ میں یہ چیز بھی ہے کہ میں اپنے مال میں سے اللہ اور اس کے رسول کو صدقہ دوں۔ آپ (صلی اللہ علیہ وآلہ وسلم) نے ارشاد فرمایا : ” اپنے مال میں سے بعض کو روک لو “ میں نے عرض کیا۔ میں نے خیبر میں اپنا حصہ روک لیا ہے۔ حضرت کعب کہتے ہیں۔ خدا کی قسم ! اللہ تعالیٰ نے کسی آدمی کو سچی بات کہنے میں اس طرح نہیں آزمایا جس طرح اللہ تعالیٰ نے مجھے آزمایا۔