(٣٨١٩٤) حضرت عبید اللہ بن عبداللہ بن عتبہ سے روایت ہے کہ میں حضرت عائشہ کی خدمت میں حاضر ہوا اور میں نے کہا۔ آپ مجھے رسول اللہ (صلی اللہ علیہ وآلہ وسلم) کے مرض کے بارے میں بیان کریں ۔ انھوں نے کہا : ہاں (بیان کرتا ہوں) رسول اللہ (صلی اللہ علیہ وآلہ وسلم) بیمار ہوئے اور آپ (صلی اللہ علیہ وآلہ وسلم) کی طبیعت بوجھل ہوگئی اور آپ (صلی اللہ علیہ وآلہ وسلم) پر غشی طاری ہوگئی۔ حضرت عائشہ کہتی ہیں : پھر آپ (صلی اللہ علیہ وآلہ وسلم) کو افاقہ ہوا تو آپ (صلی اللہ علیہ وآلہ وسلم) نے فرمایا : ” میرے واسطے لگن میں پانی رکھ دو ۔ “ چنانچہ ہم نے یہ حکم پورا کیا۔ حضرت عائشہ کہتی ہیں : پھر آپ (صلی اللہ علیہ وآلہ وسلم) نے غسل فرمایا پھر آپ (صلی اللہ علیہ وآلہ وسلم) اٹھنے لگے تھے کہ آپ پر غشی طاری ہوگئی۔ حضرت عائشہ کہتی ہیں۔ پھر آپ (صلی اللہ علیہ وآلہ وسلم) کو افاقہ ہوا تو آپ (صلی اللہ علیہ وآلہ وسلم) نے فرمایا۔ ” میرے واسطے لگن میں پانی رکھ دو “۔ حضرت عائشہ کہتی ہیں۔ ہم نے یہ حکم پورا کردیا۔ فرماتی ہیں۔ پھر آپ (صلی اللہ علیہ وآلہ وسلم) نے غسل فرمایا اور اٹھنے لگے تھے کہ پھر آپ (صلی اللہ علیہ وآلہ وسلم) پر غشی طاری ہوگئی پھر آپ (صلی اللہ علیہ وآلہ وسلم) کو افاقہ ہوا تو آپ (صلی اللہ علیہ وآلہ وسلم) نے پوچھا ۔ ” کیا لوگوں نے نماز پڑھ لی ہے۔ ؟ “ ہم نے عرض کیا۔ نہیں ! یا رسول اللہ (صلی اللہ علیہ وآلہ وسلم) ! لوگ تو آپ (صلی اللہ علیہ وآلہ وسلم) کا انتظار کررہے ہیں۔ حضرت عائشہ کہتی ہیں۔ لوگ خوب جھک کر (متوجہ ہو کر) آپ (صلی اللہ علیہ وآلہ وسلم) کا انتظار کر رہے تھے تاکہ آپ (صلی اللہ علیہ وآلہ وسلم) لوگوں کو عشاء کی نماز پڑھائیں۔
٢۔ حضرت عائشہ کہتی ہیں۔ آپ (صلی اللہ علیہ وآلہ وسلم) نے غسل فرمایا اور آپ (صلی اللہ علیہ وآلہ وسلم) اٹھنا چاہتے تھے کہ آپ (صلی اللہ علیہ وآلہ وسلم) پر غشی طاری ہوگئی پھر آپ (صلی اللہ علیہ وآلہ وسلم) کو افاقہ ہوا اور آپ (صلی اللہ علیہ وآلہ وسلم) نے پوچھا۔ ” کیا لوگوں نے نماز پڑھ لی ہے۔ ؟ “ میں نے عرض کیا : نہیں ! چنانچہ آپ (صلی اللہ علیہ وآلہ وسلم) نے حضرت ابوبکر کی طرف پیغام بھیجا کہ وہ لوگوں کو نماز پڑھائیں۔ حضرت عائشہ کہتی ہیں۔ حضرت ابوبکر کے پاس قاصدآیا اور آ کر کہا۔ اللہ کے رسول (صلی اللہ علیہ وآلہ وسلم) نے آپ کو حکم دیا ہے کہ آپ لوگوں کو نماز پڑھائیں۔ حضرت ابوبکر نے کہا۔ اے عمر ! لوگوں کو نماز پڑھاؤ۔ حضرت عمر نے کہا۔ آپ اس کے زیادہ حق دار ہیں۔ رسول اللہ (صلی اللہ علیہ وآلہ وسلم) نے آپ ہی کی طرف قاصد بھیجا ہے۔ حضرت عائشہ کہتی ہیں۔ چنانچہ حضرت ابوبکر نے ان دنوں میں لوگوں کو نمازیں پڑھائیں۔
٣۔ پھر رسول اللہ (صلی اللہ علیہ وآلہ وسلم) نے اپنے نفس میں ہلکا پن محسوس کیا تو آپ (صلی اللہ علیہ وآلہ وسلم) حضرت عباس اور ایک اور آدمی کے درمیان نماز ظہر کے لیے باہر تشریف لائے۔ آپ (صلی اللہ علیہ وآلہ وسلم) نے ان دونوں سے فرمایا۔ مجھے ابوبکر کے دائیں طرف بٹھا دو ۔ پس جب حضرت ابوبکر نے یہ بات سنی تو انھیں آپ (صلی اللہ علیہ وآلہ وسلم) محسوس ہوئے وہ پیچھے ہٹنے لگے۔ آپ (صلی اللہ علیہ وآلہ وسلم) نے ان کو حکم دیا کہ وہ اپنی جگہ پر ہی رہیں۔ حضرت عائشہ کہتی ہیں۔ چنانچہ ان دونوں صحابہ نے آپ (صلی اللہ علیہ وآلہ وسلم) کو حضرت ابوبکر کے دائیں جانب بٹھا دیا۔ پس حضرت ابوبکر ، نبی کریم (صلی اللہ علیہ وآلہ وسلم) کی (اقتداء میں) نماز پڑھنے لگے اور باقی لوگ حضرت ابوبکر (کی اقتداء میں) نماز پڑھنے لگے۔
٤۔ روای کہتے ہیں : پھر میں حضرت ابن عباس کی خدمت میں حاضر ہوا اور میں نے عرض کیا۔ کیا میں آپ پر وہ حدیث پیش نہ کروں جو مجھ سے امی عائشہ نے بیان کی ہے ؟ انھوں نے کہا۔ لاؤ۔ پس میں نے یہ حدیث حضرت ابن عباس پر پیش کی تو انھوں نے اس میں سے کسی بات کا انکار نہ کیا مگر انھوں نے یہ کہا۔ کیا انھوں نے تمہیں بتایا کہ دوسرا آدمی کون تھا ؟ راوی کہتے ہیں : میں نے عرض کیا۔ نیں و ! انھوں نے فرمایا : یہ دوسرا آدمی حضرت علی تھے۔