(٤٧٨٩) حضرت ابو قتادہ فرماتے ہیں کہ ایک رات حضور (صلی اللہ علیہ وآلہ وسلم) کے ساتھ ایک سفر میں تھے۔ رات کو ہم نے کہا کہ یارسول اللہ ! اگر اس وقت ہم پڑاؤ ڈال لیں تو اچھا ہو۔ آپ حضور (صلی اللہ علیہ وآلہ وسلم) نے فرمایا کہ مجھے ڈر ہے تم نماز کے وقت میں سوئے رہو گے۔ ہمیں نماز کے لیے کون جگائے گا ؟ حضرت بلال نے کہا کہ میں جگاؤں گا۔ چنانچہ لوگوں نے پڑاؤ ڈالا اور سو گئے۔ حضرت بلال نے اپنی سواری سے ٹیک لگائی اور ان پر نیند غالب آگئی۔ جب نبی پاک (صلی اللہ علیہ وآلہ وسلم) بیدار ہوئے تو سورج طلوع ہوچکا تھا۔ آپ حضور (صلی اللہ علیہ وآلہ وسلم) نے فرمایا اے بلال ! جو بات تم نے کہی تھی وہ کیا ہوئی ؟ انھوں نے عرض کیا کہ جیسی نیند مجھے آج آئی اب سے پہلے کبھی نہیں آئی۔ آپ حضور (صلی اللہ علیہ وآلہ وسلم) نے فرمایا کہ اللہ تعالیٰ تمہاری روحوں کو جب چاہتا ہے قبض کرلیتا ہے اور جب چاہتا ہے چھوڑ دیتا ہے۔ پھر آپ حضور (صلی اللہ علیہ وآلہ وسلم) نے صحابہ کو اپنی ضروریات کے لیے منتشر ہونے کا حکم دیا اور انھوں نے وضو کیا۔ جب سورج بلند ہوگیا تو آپ نے انھیں فجر کی نماز پڑھائی۔