(٧٢٤٦) حضرت عبید اللہ بن عتبہ فرماتے ہیں کہ میں ام المؤمنین حضرت عائشہ کی خدمت میں حاضر ہوا، میں نے ان سے عرض کیا کہ کیا آپ مجھے حضور (صلی اللہ علیہ وآلہ وسلم) کے مرض الوفات کے بارے میں بتائیں گی ؟ انھوں نے فرمایا کیوں نہیں۔ جب آپ (صلی اللہ علیہ وآلہ وسلم) کی طبیعت مبارکہ بہت بوجھل ہوگئی تو آپ نے دریافت فرمایا کہ کیا لوگوں نے نماز پڑھ لی ؟ میں نے کہا نہیں، ابھی نہیں پڑھی۔ اے اللہ کے رسول ! وہ آپ کا انتظار کررہے ہیں۔ آپ نے فرمایا کہ میرے لیے برتن میں پانی رکھو۔ چنانچہ ہم نے ایسا ہی کیا۔ آپ نے غسل فرمایا، پھر آپ مشکل سے اٹھے، لیکن آپ پر بےہوشی طاری ہوگئی پھر کچھ دیر بعد افاقہ ہوا تو آپ نے دریافت فرمایا کہ کیا لوگوں نے نماز پڑھ لی۔ ہم نے کہا نہیں وہ آپ کا انتظار کررہے ہیں۔ آپ نے فرمایا کہ میرے لیے برتن میں پانی رکھو۔ ہم نے ایسا ہی کیا۔ آپ نے غسل فرمایا، پھر آپ مشکل سے اٹھے، لیکن آپ پر بےہوشی طاری ہوگئی پھر کچھ دیر بعد افاقہ ہوا تو آپ نے دریافت فرمایا کہ کیا لوگوں نے نماز پڑھ لی۔ ہم نے کہا نہیں، اے اللہ کے رسول ! وہ آپ کا انتظار کررہے ہیں۔ لوگ مسجد میں رکے ہوئے عشاء کی نماز پڑھنے کے لیے آپ کے منتظر تھے۔
پھر آپ حضور (صلی اللہ علیہ وآلہ وسلم) نے حضرت ابوبکر کو پیغام بھجوایا کہ لوگوں کو نماز پڑھائیں۔ جب حضور (صلی اللہ علیہ وآلہ وسلم) کا قاصد حضرت ابوبکر کے پاس آیا اور انھیں بتایا کہ حضور (صلی اللہ علیہ وآلہ وسلم) آپ کو نماز پڑھنے کا حکم دے رہے ہیں۔ حضرت ابوبکر ایک نرم دل آدمی تھے ، انھوں نے حضرت عمر سے کہا کہ آپ نماز پڑھائیں۔ حضرت عمر نے کہا کہ آپ اس کے زیادہ حقد ار ہیں۔ چنانچہ ان دنوں میں حضرت ابوبکر نے لوگوں کو نماز پڑھائی۔
حضرت عائشہ فرماتی ہیں کہ پھر آپ کی طبیعت مبارکہ میں کچھ بہتری آئی تو آپ ظہر کی نماز کے لیے دو آدمیوں کے درمیان ان کے سہارے سے چلتے ہوئے مسجد تشریف لے گئے۔ اس وقت ابوبکر لوگوں کو نماز پڑھا رہے تھے۔ جب حضرت ابوبکر نے نبی (صلی اللہ علیہ وآلہ وسلم) کو دیکھا تو پیچھے ہٹنے لگے۔ آپ نے اشارے سے انھیں پیچھے ہٹنے سے منع کیا اور ان دونوں آدمیوں سے کہا کہ مجھے ان کے ساتھ بٹھا دو ۔ ان دونوں نے حضور (صلی اللہ علیہ وآلہ وسلم) کو ان کے ساتھ بٹھا دیا۔ حضرت ابوبکر کھڑے ہو کر نبی (صلی اللہ علیہ وآلہ وسلم) کی اقتداء کررہے تھے اور لوگ حضرت ابوبکر کی نماز کی اقتداء کررہے تھے۔ نبی پاک حضور (صلی اللہ علیہ وآلہ وسلم) بیٹھ کر نماز پڑھ رہے تھے۔
حضرت عبیداللہ کہتے ہیں کہ میں حضرت عبداللہ بن عباس کے پاس حاضر ہوا اور میں نے ان سے کہا کہ میں آپ کو نبی (صلی اللہ علیہ وآلہ وسلم) کے مرض الوفات کا وہ واقعہ سناؤں جو مجھ سے حضرت عائشہ نے بیان کیا ہے ؟ انھوں نے کہا کہ ہاں بیان کرو۔ میں نے بیان کیا تو انھوں نے اس واقعہ میں سے ایک بات کا بھی انکار نہیں کیا۔