(٧٤٢٤) حضرت عبداللہ بن حارث فرماتے ہیں کہ میں حضرت ابن عباس کے ساتھ حضرت معاویہ کی خدمت میں حاضر ہوا۔ حضرت معاویہ نے ان کو تخت پر بٹھایا، پھر ان سے فرمایا کہ یہ دو رکعتیں جو لوگ عصر کے بعد پڑھتے ہیں، ان کی کیا حقیقت ہے، ہم نے تو رسول اللہ (صلی اللہ علیہ وآلہ وسلم) کو یہ نماز پڑھتے نہیں دیکھا اور نہ ہی اس کا حکم دیا ہے ؟ حضرت ابن عباس نے فرمایا کہ حضرت ابن زبیر لوگوں کو اس نماز کا حکم دیتے ہیں۔ حضرت معاویہ نے حضرت ابن زبیر کو بلا کر اس بارے میں پوچھا تو انھوں نے فرمایا کہ مجھے حضرت عائشہ نے اس کے بارے میں بتایا ہے۔ حضرت معاویہ نے حضرت عائشہ کے پاس پیغام بھجوایا تو انھوں نے فرمایا کہ مجھے ام سلمہ نے اس بارے میں بتایا ہے۔ حضرت معاویہ نے حضرت ام سلمہ کے پاس آدمی بھیجا تو میں بھی ان کے ساتھ گیا۔ اس نے حضرت ام سلمہ سے سوال کیا تو حضرت ام سلمہ نے فرمایا کہ اللہ تعالیٰ حضرت عائشہ پر رحم فرمائے، انھوں نے یہ مراد کیسے لے لی ؟ میں نے انھیں بتایا تھا کہ رسول اللہ (صلی اللہ علیہ وآلہ وسلم) نے ان دو رکعتوں سے منع فرمایا ہے۔
اصل بات یہ ہے کہ ایک مرتبہ نبی (صلی اللہ علیہ وآلہ وسلم) میرے گھر میں تھے اور آپ نے ظہر کے لیے وضو فرمایا۔ آپ نے ایک آدمی کو زکوۃ جمع کرنے کے لیے بھیجا ہوا تھا وہ واپس آیا اور اس کے پاس بہت سے مہاجرین جمع ہوگئے۔ اس نے دروازہ کھٹکھٹایا، آپ باہر تشریف لے گئے اور ظہر کی نماز ادا فرمائی۔ پھر بیٹھ کر اس مال کو لوگوں میں تقسیم فرمانے لگے یہاں تک کہ عصر کی نماز کا وقت ہوگیا۔ جب آپ فارغ ہوئے تو حضرت بلال نے آپ کو دیکھ کر عصر کی اقامت کہی اور آپ نے نماز پڑھائی۔
پھر آپ میرے حجرے میں تشریف لائے اور دو رکعتیں ادا فرمائیں۔ جب آپ نماز پڑھ چکے تو میں نے عرض کیا کہ یہ دو رکعتیں جو آپ نے ابھی ادا کی ہں م یہ کون سی ہیں ؟ میں نے تو پہلے آپ کو یہ نماز ادا کرتے نہیں دیکھا۔ آپ نے فرمایا کہ زکوۃ وصول کرنے والے کی مشغولیت نے مجھے ظہر کے بعد کی دو رکعتیں ادا کرنے سے روکے رکھا، میں نے انھیں اب ادا کیا ہے۔
حضرت ابن زبیر نے فرمایا کہ جب رسول اللہ (صلی اللہ علیہ وآلہ وسلم) نے انھیں ادا کیا ہے تو میں انھیں ضرور پڑھوں گا۔