(٨٨٠٩) حضرت جابر فرماتے ہیں کہ ایک مرتبہ میں اپنے والد کے ایک قرضے کے سلسلے میں مدد حاصل کرنے نبی پاک (صلی اللہ علیہ وآلہ وسلم) کی خدمت میں حاضر ہوا تو آپ نے فرمایا کہ تم چلے جاؤ، میں خود تمہارے گھر آتا ہوں۔ میں نے گھر آکر اپنی بیوی سے کہا کہ تم رسول اللہ (صلی اللہ علیہ وآلہ وسلم) سے کوئی بات نہ کرنا اور آپ کو تکلیف نہ دینا۔ جب آپ (صلی اللہ علیہ وآلہ وسلم) تشریف لائے تو اس نے کہا کہ اے اللہ کے رسول ! میرے لیے اور میرے خاوند کے لیے رحمت کی دعا کردیجئے۔ آپ نے فرمایا کہ اللہ تجھ پر اور تیرے خاوند پر رحمت نازل فرمائے۔ اس عورت نے کہا کہ اے اللہ کے رسول ! آپ ہمارے پاس تشریف لائے آپ نے ہمیں کیوں نہیں بلالیا۔