Kanz al-Ummal: Hadith 11776

11772 ۔۔۔ حضرت عمرو بن العاص (رض) فرماتے ہیں میں نے قریش کو اسی دن دیکھا جس دن انھوں نے جناب نبی کریم (صلی اللہ علیہ وآلہ وسلم) کے قتل کی سازش کی اور ارادہ کرلیا، اس وقت خانہ کعبہ کے سائے میں بیٹھے ہوئے تھے اور جناب رسول اللہ (صلی اللہ علیہ وآلہ وسلم) مقام ابراہیم کے نزدیک نماز ادا فرما رہے تھے چنانچہ عقبہ بن ابی معیط کھڑا ہوا اور اپنی چادر کو آپ (صلی اللہ علیہ وآلہ وسلم) کے مبارک گلے میں ڈال کر کھینچا یہاں تک کہ آپ (صلی اللہ علیہ وآلہ وسلم) اپنے گھٹنوں پر گرپڑے، لوگوں نے چیخنا شروع کردیا اور سمجھے کہ شاید (معاذ اللہ ) رسول اللہ (صلی اللہ علیہ وآلہ وسلم) قتل ہوگئے، حضرت ابوبکر صدیق (رض) آگے بڑھے اور پیچھے سے آپ (صلی اللہ علیہ وآلہ وسلم) کے مبارک پہلوؤں کو پکڑ کر کھینچا اور کہا کہ کیا تم ایسے شخص کو قتل کرتے ہو جو یہ کہتا ہے کہ اللہ میرا رب ہے ؟ چنانچہ پھر وہ لوگ جناب رسول اللہ (صلی اللہ علیہ وآلہ وسلم) کو چھوڑ کر ایک طرف ہوگئے، چنانچہ رسول اللہ (صلی اللہ علیہ وآلہ وسلم) کھڑے ہوئے اور اپنی نماز مکمل کرنے لگے جب نماز ادافرماچکے تو ان کے پاس سے گزرے وہ بدستور خانہ کعبہ کے سائے میں بیٹھے ہوئے تھے آپ (صلی اللہ علیہ وآلہ وسلم) نے فرمایا، اے قریشیوں کے گروہ ! قسم اس ذات کی جس کے قبضے میں میری جان ہے میں تمہیں ذبح کرنے کے لیے ہی بھیجا گیا ہوں اور آپ (صلی اللہ علیہ وآلہ وسلم) نے اپنی انگشت مبارک اپنے حلق کی طرف اشارہ فرمایا۔ ابوجہل بولا تو اتنا جاہل تو نہ تھا۔ معاذ اللہ ثم معاذ اللہ
تو آپ (صلی اللہ علیہ وآلہ وسلم) نے اس سے فرمایا تو جو ہے۔ (ابن ابی شیبہ)